Sakri News : दरोडेखोरांनी अपहरण केलेल्या तरुणीची सुटका; संशयित आरोपीही ताब्यात

Sakri News : साक्री शहरामध्ये दरोडेखोरांनी सोने- चांदीच्या दागिन्यांसह तरुणीचे देखील अपहरण करून नेल्याची धक्कादायक घटना घडली होती. या प्रकरणाचे गांभीर्य लक्षात घेता पोलिसांनी तपासाची चक्रे फिरवली असता सदर तरुणी ही मध्यप्रदेश येथील शेंदवा या ठिकाणी पोलिसांना आढळून आली आहे. शेंदवा पोलिसांनी तरुणीला शिरपूर ग्रामीण पोलिसांच्या ताब्यात दिले आहे.

साक्री शहरात २५ नोव्हेंबरच्या रात्री दरोडेखोरांनी घरात प्रवेश करत दरोडा टाकला होता. घरात एक महिला व तरुणी अशा दोघेच घरात होत्या. दरोडेखोरांना विरोध केला असता त्यांच्यात झटपट झाली. तरी देखील दरोडेखोरांनी सोने व चांदीचे दागिने लांबवीले होते. तर महिलेचे हातपाय बांधून तोंडात रुमाल कोंबून तरुणीला घेऊन फरार झाले होते. या घटनेचे गांभीर्य लक्षात घेत पोलिसांनी लागलीच तपासचक्रे फिरविण्यास सुरवात केली.

Chhagan Bhujbal : शिंदे समितीचे काम संपले, ती बरखास्त करा, कुणबी दाखलेही रद्द करा; छगन भुजबळांची मागणी

दरोडेखोरांनी अपहरण केलेल्या तरुणीचा शोध घेतला. सदर तरुणी शेंदवा येथे आढळून आली. शेंदवा पोलिसांनी या तरुणीस शिरपूर ग्रामीण पोलिसांच्या स्वाधीन केले असून शिरपूर ग्रामीणच्या पोलीस अधिकाऱ्यांनी तरुणीला साक्री पोलिसांच्या स्वाधीन केले. या घटनेसंदर्भात पोलीस कसून तपास करीत असून काही संशयतांना देखील पोलिसांनी ताब्यात घेतले आहे. तसेच तरुणीची देखील विचारपूस करून तिच्याकडून मिळालेल्या माहितीच्या अनुषंगाने सदर दरोडेखोरांचा शोध साक्री पोलिसांसह स्थानिक गुन्हे अन्वेषण विभागातर्फे घेण्यात येत आहे.