Raj Thackeray : सर्वोच्च न्यायालयाने निवडणूक आयुक्तांसंदर्भात दिलेल्या निर्णयाचं राज ठाकरेंकडून स्वागत; म्हणाले, “लोकशाही संस्थांची स्वायत्तता ही टिकायलाच हवी ”

Raj Thackeray : निवडणूक आयुक्तांच्या नियुक्तींसंदर्भात आज सर्वोच्च न्यायालयाने एक महत्त्वाचा निर्णय दिला आहे. मुख्य निवडणूक आयुक्त आणि इतर निवडणूक आयुक्तांची नेमणूक पंतप्रधान, विरोधी पक्षनेते आणि सर्वोच्च न्यायालयाचे सरन्यायाधीश यांचा समावेश असलेल्या समितीच्या शिफारशीनुसार राष्ट्रपतींनी करावी, असं सर्वोच्च न्यायालयाने म्हटलं आहे. न्यायालयाच्या या निर्णयाचं राजकीय पक्षांकडून स्वागत करण्यात येत आहे. दरम्यान, महाराष्ट्र नवनिर्माण सेनेचे अध्यक्ष राज ठाकरे यांनीही यासंदर्भात प्रतिक्रिया दिली.

राज ठाकरे यांनी ट्वीट करत न्यायालयाच्या या निर्णयाचं स्वागत केलं आहे. “निवडणूक आयुक्तांची नियुक्तीसंदर्भात नवा कायदा होईपर्यंत पंतप्रधान, विरोधी पक्षनेते आणि सर्वोच्च न्यायालयाचे सरन्यायाधीश यांचा समावेश असलेल्या समितीच्या शिफारशीनुसार राष्ट्रपतींनी करावी, या सर्वोच्च न्यायालयाच्या निर्णयाचं महाराष्ट्र नवनिर्माण सेना स्वागत करते”, अशी प्रतिक्रिया त्यांनी दिली. तसेच लोकशाही संस्थांची स्वायत्तता टिकायलाच हवी, असेही ते म्हणाले.

सर्वोच्च न्यायालयाचा महत्त्वाचा निर्णय

दरम्यान, आज सर्वोच्च न्यायालयाने निवडणूक आयुक्तांच्या नेमणुकीसंदर्भात महत्त्वाचा निर्णय दिला. मुख्य निवडणूक आयुक्त आणि इतर निवडणूक आयुक्तांची नेमणूक पंतप्रधान, विरोधी पक्षनेते आणि सर्वोच्च न्यायालयाचे सरन्यायाधीश यांचा समावेश असलेल्या समितीच्या शिफारशीनुसार राष्ट्रपतींनी करावी, असं सर्वोच्च न्यायालयाने म्हटलं. तसेच विरोधी पक्षनेते नसतील तर, तेव्हा संसदेतील सर्वात मोठ्या विरोधी पक्षाचे नेते या समितीचे सदस्य असतील असेही न्यायालयाकडून स्पष्ट करण्यात आले. याबरोबरच निवडणूक आयुक्तांच्या नियुक्तींबाबत सर्वोच्च न्यायालयाने संसदेला नवीन कायदा बनविण्याचे निर्देश दिले.