Pune Rain News : पुण्याला अवकाळी पावसाने झोडपलं; वाहतूक कोंडी अन् वीजही गेली

पुणेः राज्यात परवापासून सर्वत्र अवकाळी पावसाला सुरुवात झाली आहे. काल तर मराठवाड्यामध्ये वादळी वाऱ्यासह मोठ्या प्रमाणावर गारपीट झाली. आज पुण्यात अवकाळी पाऊस सुरु झाला आहे.

पुण्यातल्या वडगाव धायरी येथे विजेच्या कडकडाट व वादळी वाऱ्यांसह जोरदार पाऊस तसेच वडगाव धायरीमध्ये वीज गेली आहे. रामटेकडी, वैदूवाडी भागात विजेच्या प्रचंड गडगडाटासह जोरात पाऊस सुरू झाला आहे. मुंढवा, केशवनगर, खराडी भागामध्ये पावसाला जोरदार सुरुवात झालीय.

हवामान विभागाने दिलेल्या माहितीनुसार राज्यातल्या काही जिल्ह्यांमध्ये विजांचा कडकडाट, गारा आणि वादळी वाऱ्यासह आज अवकाळी पाऊस होऊ शकतो. दुपारी साडेतीन वाजल्यानंतर पावसाचा इशारा देण्यात आलेला आहे.

यामध्ये सातारा, पुणे, अहमदनगर, नाशिक, धुळे, जळगाव, बीड, छत्रपती संभाजीनगर, परभणी, लातूर, नांदेड, जालना, बुलढाणा, वाशिम, अकोला, अमरावती, यवतमाळ या जिल्ह्यांचा समावेश असून अलर्ट जारी करण्यात आलेला आहे.