Pune : आज पुण्यात बत्तीगुल; दुरुस्ती कामासाठी ‘या’ भागांत 7 तास वीजपुरवठा बंद, महावितरणाचा निर्णय

Pune : पुण्याच्या मध्यवर्ती पेठांसह नरवीर तानाजी मालुसरे रस्ता (सिंहगड रस्ता) आणि नऱ्हे-आंबेगावमधील अनेक परिसरांत आज (गुरुवारी) सकाळी साडेदहा ते साडेपाच या वेळेत वीजपुरवठा खंडित राहणार आहे. ‘महावितरण’च्या पर्वती विभागांतर्गत वीजवाहिन्यांच्या देखभाल-दुरुस्तीच्या नियोजित कामांसाठी वीजपुरवठा बंद राहणार आहे.

याबाबत, पर्वती विभागाच्या कार्यकारी अभियंत्यांनी निवेदन दिले आहे. पर्वती विभागांतर्गत २२/११ के.व्ही. क्षमतेच्या नवी पेठ, तक्षशिला आणि ११ के.व्ही. क्षमतेच्या तरुण भारत व विठ्ठलवाडी या वीजवाहिन्यांच्या दुरुस्तीची कामे केली जाणार आहेत. त्यामुळे या वाहिन्यांमार्फत वीजपुरवठा होणाऱ्या परिसरात दिवसभर वीजपुरवठा विस्कळित होणार आहे. देखभाल-दुरुस्तीची कामे संपल्यानंतर सायंकाळी साडेपाच वाजेपर्यंत टप्प्याटप्प्याने वीजपुरवठा पूर्ववत होणार आहे.

Pune Metro : मार्चमध्ये मेट्रो सुरू करण्याच्या घोषणा, पण वास्तव वेगळंच; हिंजवडी–शिवाजीनगर मेट्रोची डेडलाईन पुन्हा पुढे जाणार?

या भागात वीजपुरवठा राहणार बंद...
मध्यवर्ती पेठा : नवी पेठ, सदाशिव पेठ, शुक्रवार पेठ, बुधवार पेठ, लक्ष्मी रस्ता, थोरले बाजीराव रस्ता, टिळक रस्ता आणि कुमठेकर रस्ता, लाल बहादूर शास्त्री रस्ता परिसर.
नरवीर तानाजी मालुसरे रस्ता : धायरी, नन्हेगाव, आंबेगाव, कात्रज चौक, आनंदनगर, जनता वसाहत परिसर.