Pune : मोठी बातमी रेल्वे प्रवाशांना फटका; पुणे–नागपूर मार्गावरील काही गाड्या २२ दिवस रद्द, पर्यायी व्यवस्था काय?

 

Pune :  पुणे विभागातून विदर्भ आणि मराठवाड्याकडे जाणाऱ्या रेल्वे प्रवाशांसाठी एक मोठी आणि महत्त्वाची बातमी आहे. दौंड आणि मनमाड दरम्यान रेल्वे मार्गाच्या दुहेरीकरणाचे काम सुरू असल्याने या मार्गावरील रेल्वे वाहतुकीवर मोठा परिणाम झाला आहे. या कामामुळे पुणे-नागपूर आणि पुणे-अमरावतीसह अनेक महत्त्वाच्या गाड्या २२ दिवसांसाठी रद्द करण्यात आल्या आहेत.

२५ जानेवारीपर्यंत कामाचा धडाका
मध्य रेल्वेच्या पुणे विभागांतर्गत दौंड ते काष्टी स्थानकांदरम्यान हे दुहेरीकरणाचे काम हाती घेण्यात आले आहे. यामध्ये 'प्री-नॉन इंटरलॉकिंग' आणि 'नॉन-इंटरलॉकिंग'चे तांत्रिक काम केले जात आहे. ४ जानेवारीपासून सुरू झालेले हे काम २५ जानेवारी २०२६ पर्यंत चालणार आहे. या २२ दिवसांच्या कालावधीत रेल्वेने ३० हून अधिक गाड्या रद्द केल्या असून काहींचे मार्ग बदलले आहेत.

Pune : पुणे मेट्रोवर श्रेयाची लढाई! अजित पवारांवर आरोप, मुरलीधर मोहोळांचा प्रत्युत्तरात्मक हल्ला

प्रमुख रद्द गाड्यांची यादी
या तांत्रिक कामामुळे पुणे आणि नागपूरला जोडणाऱ्या प्रमुख रेल्वे गाड्यांना फटका बसला आहे. यामध्ये प्रामुख्याने खालील गाड्यांचा समावेश आहे.

पुणे-अमरावती एक्सप्रेस (११०२५/११०२६)
पुणे-नागपूर गरीब रथ एक्सप्रेस (१२११३/१२११४)

पुणे-अजनी हमसफर एक्सप्रेस
अजनी-पुणे हमसफर एक्सप्रेस

पुणे-नागपूर एक्सप्रेस (काही ठराविक दिवस
निझामाबाद-पंढरपूर एक्सप्रेस

पुणे-दौंड-बारामती दरम्यानच्या डेमू (DEMU) गाड्या

प्रवाशांची गैरसोय आणि पर्यायी नियोजन
ऐन हिवाळ्याच्या काळात आणि कामाच्या निमित्ताने प्रवास करणाऱ्या नागरिकांना या निर्णयामुळे मोठा फटका बसला आहे. रेल्वेचे आरक्षण आधीच फुल्ल असल्याने आणि ऐनवेळी गाड्या रद्द झाल्याने प्रवाशांना खासगी बस किंवा इतर पर्यायांचा शोध घ्यावा लागत आहे. विशेषतः पुणे-नागपूर दरम्यान धावणाऱ्या हमसफर आणि गरीब रथ या गाड्या रद्द झाल्याने मध्यमवर्गीय प्रवाशांचे नियोजन कोलमडले आहे.

रेल्वे प्रशासनाने प्रवाशांना विनंती केली आहे की, प्रवासाला निघण्यापूर्वी अधिकृत वेबसाईटवर किंवा रेल्वे हेल्पलाईनवर गाड्यांची सद्यस्थिती तपासून पाहावी. दुहेरीकरणाचे हे काम पूर्ण झाल्यानंतर या मार्गावरील रेल्वेचा वेग वाढणार असून भविष्यात प्रवासाचा वेळ वाचणार असल्याचेही प्रशासनाने स्पष्ट केले आहे.