Pune Metro : पुणे मेट्रोच्या दुसऱ्या टप्प्याला वेग; डबल डेकर पुलांवर उभारणार दोन मार्गिका, हडपसर–फुरसुंगीसह कुठे असतील स्थानकं

Pune : पुणे मेट्रोच्या दुसऱ्या टप्प्यासाठी MahaMetroने काम सुरू केलं आहे. या टप्प्यात मेट्रो मार्गिका 4-B व 4-C चा समावेशा आहे. मेट्रो मार्गिका 4-B हडपसर ते लोणी काळभोर जोडणार असून या मार्गिकेवर सध्या 10 स्थानके प्रस्तावित आहेत. शिवाय मेट्रो 4-C ही हडपसर ते सासवड अशी असणार आहे. या मार्गिकेवरील 4 स्थानकांचं काम सध्या सुरू होणार आहे.

या दोन्ही मार्गिकांसाठी सल्लागार नेमण्याची प्रक्रिया सुरू केली असून त्यासाठी निविदा मागवण्यात आल्या आहेत. यासाठी अंतिम मुदत 5 मार्च 2026 दिली आहे. पुणे मेट्रोच्या विस्तारीकरणामुळे पूर्व आणि दक्षिणेतील उपनगरांना थेट जोडणी मिळणार आहे. या मेट्रो मार्गिकांसाठी डबल डेकर उड्डाणपूल उभारण्यात येणार आहेत. हडपसर, फुरसुंगी, लोणी काळभोर, सासवड या सर्व भागांना थेट या नव्या मार्गिका जोडतील. त्यामुळे पुणेकरांचा प्रवास सुलभ आणि कोंडीमुक्त होणार आहे.

मेट्रो लाईन 4 - B
मेट्रो लाईन 4 -ब 11.102 किमी लांब उन्नत मार्गिका असणार आहे. या मार्गिकेवर एकूण 10 स्थानके असून 2 टप्पे असणार आहेत. पहिल्या टप्प्यावर वाहनांसाठी उड्डाणपूल असणार आहे. त्यावरती मेट्रो मार्गिका उभारण्यात येणार आहे. हडपसर फाटा, हडपसर बस डेपो, आकाशवाणी-हडपसर, लक्ष्मी कॉलनी, मंजरी फाटा, द्राक्ष बाग, टोल नाका, वाक वस्ती आणि लोणी काळभोर अशी स्थानकं असतील.

मेट्रो लाईन 4-C
पुणे मेट्रो 4-C 5.573 किमी लांब असून यावरती ही डबल डेकर उड्डाणपूल उभारण्यात येणार आहे. या मार्गिकेवर सध्या 4 स्थानके प्रस्तावित आहेत. हडपसर ग्लायडिंग क्लब, फुरसुंगी IT Park< सुलभ उद्यान आणि सासवड रस्ता रेल्वे स्थानक अशी ही स्थानके असतील. यामुळे पुण्याच्या पुर्वेकडील भागांतील वाहतूक सुलब होणार आहे.

या दोन्ही मार्गिका पुणे मेट्रोच्या Khadakwasla - Kharadi Corridor एक भाग आहेत. या मार्गिकेवरील दोन उड्डाणपूल पुणे-सोलापूर महामार्गाचा भाग असतील. त्यामुळे पुणे-सोलापूर वाहन चालकांचा प्रवासही सुखकर होणार आहे. सध्या पुणे मेट्रो 3 च्या हिंजवडी-शिवाजीनगर मेट्रो मार्गिकेचं काम अंतिम टप्प्यात असून, लवकरच ती प्रवाशांसाठी सुरु होणार आहे.