Pune Guardian Minister : चंद्रकांत पाटील यांच्या हातून पुणे जाणार? अजित पवार होऊ शकतात नवीन पालकमंत्री

सूत्रांनी दिलेल्या माहितीनुसार, शिंदे आणि फडणवीस सरकारमध्ये सामील झाल्यानंतरअजित पवार यांनी उपमुख्यमंत्रीपदाची शपथ घेतली. यातच आता नवीन माहिती समोर आली आहे की, अजित पवार यांना पुण्यातील पालकमंत्रीपदाची जबाबदारी दिली आजू शकते. इतकंच नाही तर 10 ते 12 पालकमंत्रिपद हे अजित पवार गटाला देण्यात येणार आहे.  

पुणे जिल्ह्याच्या राजकारणात पालकमंत्री हे पद अत्यंत महत्त्वाचे मानले जाते. २००४ ते २०१४ या आघाडी सरकारच्या कालवधीत पवार यांच्याकडे हे पद होते. तर २०१९ मध्ये महाविकास आघाडी सत्तेत आल्यानंतर ही अजित पवार यांच्याकडेच हे पद आले होते. मात्र, वर्षभरापूर्वी महाविकास आघाडीचे सरकार सत्तेतून पायउतार झाल्यानंतर चंद्रकांत पाटील यांच्याकडे पालकमंत्री पदाची जबाबदारी आली. 

दरम्यान, पुणे शहर व जिल्ह्यात मिळून २१ आमदार आहेत. शहराचा विचार केला तर ८ आमदारांपैकी ५ भाजपचे, २ राष्ट्रवादी काँग्रेसचे आणि १ आमदार काँग्रेसचा आहे. आगामी काळ हा स्थानिक स्वराज्य संस्थांच्या निवडणुकांचा आहे.