Pune : लेह-लडाखहून परतताना दुर्दैवी अपघात; पुण्यातील तीन मित्रांचा मृत्यू, विमानाने परतलेला चौथा मित्र धक्क्यात

Pune : पर्यटनासाठी लेह-लडाख येथे गेलेल्या पिंपरी-चिंचवड शहरातील तरुणांची कार पुलावरून कोसळल्याने झालेल्या अपघातात तिघांचा मृत्यू झाला. हा अपघात राजस्थानात दिल्ली-मुंबई महामार्गावर बुधवारी झाला. कुणाल चोरडिया (वय २५, रा. शांतिबन सोसायटी, चिंचवड गाव), मयुरेश पाडाळे (वय २३, रा. म्हाळुंगे पाडाळे) आणि सिद्धान्त आल्हाट (वय २१, रा. थेरगाव) अशी मृत्युमुखी पडलेल्या तरुणांची नावे आहेत.

नेमकं काय घडलं?
पोलिसांनी दिलेल्या माहितीनुसार, पिंपरी-चिंचवड शहरातील थेरगाव, वाकड आणि म्हाळुंगे परिसरातील दहा-बारा तरुणांचा ग्रुप २७ तारखेला लेह-लडाख आणि जम्मू काश्मीर येथे पर्यटनासाठी गेला होता. फिरून झाल्यानंतर बुधवारी सर्व जण माघारी परतत होते. यातील कुणाल, मयुरेश आणि सिद्धान्त यांच्या कारचा राजस्थानात कोटा येथील केथून पोलिस ठाण्याच्या हद्दीत अपघात झाला. कार पुलावरून कोसळून तिघांचा जागीच मृत्यू झाला.

तिघांचे पार्थिव आज, गुरुवारी सकाळी शहरात आणण्यात येणार आहेत. मयुरेश आणि सिद्धान्त हे दोघे उच्च शिक्षण घेत होते; तसेच वडिलांच्या व्यवसायात मदत करीत होते. कुणाल हा इंदिरा कॉलेजमध्ये बीबीए अभ्यासक्रम शिकत होता. कुणालच्या मागे आई, वडील, मोठा भाऊ आणि बहीण असा परिवार आहे.

‘राजस्थान येथे घडलेली घटना दुर्दैवी आहे. स्थानिक प्रशासनाशी संपर्क साधला असून, तरुणांच्या कुटुंबीयांसाठी आवश्यक ती सर्व मदत केली जात आहे,’ असे आमदार शंकर जगताप यांनी सांगितले.

बर्फवृष्टीमुळे पाच दिवस अडकलेले
प्रचंड बर्फवृष्टीमुळे कारगिल येथे सर्व तरुण आठ दिवसांपूर्वी अडकले होते. बर्फवृष्टी झाल्याने रस्ते बंद होते. त्यामुळे पाच दिवस ते एकाच ठिकाणी अडकले होते. त्यांना कोठेही जाता येत नव्हते. पिंपरी-चिंचवडच्या स्थानिक नेत्यांनी ‘बीएसएफ’च्या अधिकाऱ्यांशी संवाद साधून सर्वांना तेथून सुरक्षित बाहेर काढले होते. मात्र, यातील तिघांना मृत्यूने गाठल्याने शहरात हळहळ व्यक्त होत आहे.

‘त्या’ मित्राला धक्का
अपघात झालेल्या मित्रांसमवेत आणखी एक तरुण होता. मात्र, मंगळवारी त्याला अस्वस्थ वाटू लागल्याने तो विमानाने घरी परतला. मात्र, आज सकाळी त्याला अपघाताची माहिती समजली आणि मानसिक धक्का बसला.