Pune Crime : विभक्त राहणाऱ्या बायकोने चक्क नवऱ्याची दिली सुपारी; पण त्यानेच केला घात, नेमकं काय घडलं?

Pune Crime: नवरा-बायकोचा वाद होणं ही काही नवीन बाब नाही. संसाराचा गाडा हाकताना नवरा-बायकोत नेहमी वाद होत असतात. अनेकदा हे वाद लगेच मिटतात. तर काहीवेळा ते विकोपालाही जातात. यातून पुढे गंभीर गुन्हे घडतात. अशीच एक घटना पुण्यातून समोर आली आहे. विभक्त राहणाऱ्या एका पत्नीने आपल्या पतीची सुपारी दिली. पण ज्याला सुपारी दिली, त्यानेच घात केला.

सुपारी घेणाऱ्या आरोपींनी महिलेच्या पतीचे अपहरण केले आणि ठार मारण्याची धमकी देत घरात जबर चोरी केली. लोणी काळभोर पोलीस स्टेशनच्या हद्दीतील वडकी परिसरात हा संपूर्ण प्रकार घडला आहे.

याप्रकरणी डॉक्टरने दिलेल्या फिर्यादीवरून पोलिसांनी १० अनोळखी आरोपी विरोधात गुन्हा दाखल केला असून घटनेचा तपास सुरू केला आहे. याबाबत सविस्तर माहिती अशी, की फिर्यादी हे जनावरांचे डॉक्टर आहेत.

त्यांची आणि पत्नीची घटस्फोट घेण्यासाठी कोर्टात केस चालू आहे. दरम्यान ९ ऑगस्ट रोजी सायंकाळी चार वाजण्याच्या सुमारास फिर्यादी यांना फोन आला. वडकी गायकवाड रोड या ठिकाणी कुत्रे आजारी पडली असून त्याच्या उपचारासाठी बोलावून घेतले.

फिर्यादी त्या ठिकाणी केले असता, दोन ते तीन लोकांनी नंबर प्लेट नसलेल्या चार चाकी गाडीत जबरदस्तीने त्यांना बसवले. त्यांचे अपहरण करत ठार मारण्याची धमकी दिली आणि पैशाची मागणी केली. फिर्यादी यांच्या गळ्याला चाकू लावून तुझ्या नावाची तुझी पत्नी आणि मेहुण्याने सुपारी दिली आहे, असं म्हणत आरोपींनी धमकावले.

Nitin Desai Case Updates : नितीन देसाई मृत्यू प्रकरणात मोठी अपडेट; आरोपींना कोणताही दिलासा देण्यास हायकोर्टाचा नकार

तुला आम्ही संपून टाकणार आहोत. तू आम्हाला २० लाख रुपये दिले तर आम्ही तुला सोडून देऊ, तुझ्या केसालाही धक्का लागणार नाही, असे म्हणून फिर्यादीला राहत्या घरी घेऊन आले. फिर्यादी कडून घराच्या चाव्या घेतल्या आणि जबरदस्तीने घरातील दागिने आणि रोख रक्कम अशी २७ लाख १० हजार रुपये घेऊन गेले.

दरम्यान, या घटनेनंतर डॉक्टरने तातडीने पोलिसांत धाव घेतली. याप्रकरणी लोणी काळभोर पोलिसांनी १० अज्ञात आरोपींविरोधात गुन्हा दाखल केला असून घटनेचा तपास सुरू केला आहे. या घटनेनं परिसरात एकच खळबळ उडाली आहे.