Pune Crime : नवऱ्याच्या सततच्या त्रासाला कंटाळा; दोन चिमुकल्यांसह विवाहितेने आयुष्य संपवलं, पुण्यात हळहळ

Pune : पुणे जिल्ह्यातील शिरूर तालुक्यातील पाबळ परिसरात एक काळीज पिळवटून टाकणाऱ्या घटनेनं खळबळ उडाली आहे. पतीकडून होणाऱ्या सततच्या त्रासाला आणि मानसिक त्रासाला वैतागून एका 30 वर्षीय विवाहितेने आपल्या दोन निष्पाप मुलांसह विहिरीत उडी घेऊन जीवनयात्रा संपवली. मृतांमध्ये सहा वर्षांचा मुलगा आणि अवघ्या चार महिन्यांच्या तान्ह्या मुलीचा समावेश आहे. या गंभीर प्रकरणी शिक्रापूर पोलिसांनी तातडीने कारवाई करत पतीला गजाआड केलं आहे. अहिला उर्फ भाग्यश्री राजू जाधव (वय 30, आई), सार्थक राजू जाधव (वय 6, मुलगा) आणि गौरी राजू जाधव (वय 4 महिने, मुलगी) अशी मृतांची नावं असून राजू पांडुरंग जाधव (वय 32) अटक केलेल्या पतीचं नाव आहे.

मुलांना आणि सोबत सायकल घेऊन घर सोडले
मुळचे बुलढाणा जिल्ह्यातील असलेले हे जाधव कुटुंब पोटापाण्यासाठी पाबळ येथील एका वीटभट्टीवर कामाला होते. मात्र, पती राजू आणि पत्नी भाग्यश्री यांच्यात सातत्याने खटके उडत होते. काल रविवारी सकाळीही त्यांच्यात कडाक्याचं भांडण झालं. या रोजच्या कटकटीने मनातून खचलेल्या भाग्यश्रीने रागाच्याभरात दोन्ही मुलांना आणि सोबत सायकल घेऊन घर सोडले. दुपार उलटून गेली तरी पत्नी आणि मुले घरी न परतल्याने पती राजूने त्यांची शोधाशोध सुरू केली. घरापासून काही अंतरावर असलेल्या परमेश्वर पिंगळे यांच्या विहिरीच्या काठावर त्याला मुलांची सायकल आणि चपला दिसल्या. यानंतर स्थानिक ग्रामस्थांच्या मदतीने विहिरीत पाहिले असता, तिघांचेही मृतदेह पाण्यात आढळून आले.

Pune : रोहित शेट्टीच्या घरावर गोळीबार प्रकरणात पुण्यातून पाच जण ताब्यात; गँगस्टर बिश्नोई टोळीशी संबंधाचा संशय

आत्महत्येस प्रवृत्त केल्याचा गुन्हा
या घटनेची माहिती मिळताच पोलीस उपनिरीक्षक सोमनाथ कचरे आणि त्यांच्या पथकाने घटनास्थळी धाव घेतली. स्थानिकांच्या मदतीने मृतदेह बाहेर काढण्यात आले. मृत भाग्यश्री यांची बहीण जयश्री जाधव यांनी दिलेल्या फिर्यादीवरून, पोलिसांनी पती राजू पांडुरंग जाधव याच्याविरुद्ध पत्नीला आत्महत्येस प्रवृत्त केल्याचा गुन्हा दाखल करून त्याला अटक केली आहे. एका क्षुल्लक वादातून आणि संसारातील कलहातून दोन निष्पाप जीवांचा आणि एका मातेचा बळी गेल्यानं परिसरात हळहळ व्यक्त केली जात आहे. शिक्रापूर पोलीस या प्रकरणाचा अधिक तपास करत आहेत.