Pune : पुण्यात अपघातांची मालिका कायम… गरवारे कॉलेज चौकात मध्यरात्री भीषण धडक; तिघेजण गंभीर जखमी

Pune : पुण्यात सतत होणाऱ्या रस्ते अपघातांची मालिका काही केल्या थांबत नाही. मंगळवारी मध्यरात्रीही शहराच्या मध्यवस्तीत एक भीषण अपघात घडला. गरवारे कॉलेज चौकात भरधाव दुचाकीने समोरून येणाऱ्या चारचाकी कारला जोरदार धडक दिली. या धडकेने कार थेट रस्त्यावर पलटी झाली आणि अपघातात एकूण तीन जण गंभीर जखमी झाले.

Mumbai : पाच वर्षांच्या चिमुकलीचा तब्बल ५० हजारांत सौदा; वाकोला पोलिसांनी केला बालविक्री रॅकेटचा पर्दाफाश

प्रत्यक्षदर्शीनी सांगितले की, मध्यरात्री दीड वाजण्याच्या सुमारास ही दुचाकी अत्यंत वेगात होती. समोरून येणाऱ्या कारला टाळण्याचा प्रयत्न करताना चालकाचे नियंत्रण सुटले आणि जोरदार टक्कर झाली. टक्कर इतकी भीषण होती की, कार दोन-तीन वेळा पलटी होऊन रस्त्याच्या कडेला जाऊन आदळली. कारचा समोरचा भाग पूर्णपणे चेंदामेंदा झाला.

या अपघातात दुचाकीवरील दोघे तरुण गंभीर जखमी झाले आहेत. त्यांचे डोके, पाठ आणि पायांना गंभीर मार लागला आहे. तसेच कार चालविणारे चालकही किरकोळ जखमी झाले. अपघाताची माहिती मिळताच घटनास्थळी पोलीस आणि बचाव पथक दाखल झाले. तिन्ही जखमींना तात्काळ जवळच्या खासगी रुग्णालयात दाखल करण्यात आले असून त्यांच्यावर सध्या उपचार सुरू आहेत.

या अपघातामुळे काही काळ गरवारे चौकातील वाहतूक कोंडी झाली होती. पुण्यात गेल्या काही दिवसांपासून भरधाव वाहनांमुळे अपघातांचे प्रमाण वाढले असून नागरिकांमध्ये भीतीचे वातावरण आहे. वाहतूक पोलिसांनी याप्रकरणी गुन्हा दाखल करून अधिक तपास सुरू केला आहे.