Khadakwasla Dam: पुणेकरांसाठी आनंदाची बातमी! खडकवासला धरण अर्धे भरले, पाणीकपातीचं टेन्शन दूर

Pune : पुणेकरांसाठी आनंदाची बातमी आहे. पुणेकरांची पाण्याची चिंता मिटली आहे कारण दोन ते तीन दिवस पडलेल्या मुसळधार पावसातच खडकवासला धरण ५० टक्के भरले आहे. पुणेकरांवर पाणीकपातीची टांगती तलवार होती पण आता खडकवासला धरण अर्धे भरल्यामुळे पाणीकपातीचे टेन्शन दूर झाले आहे.

पुणे शहरासह जिल्ह्यात गेल्या दोन ते तीन दिवसांपासून मुसळधार पाऊस पडत आहे. याच मुसळधार पावसामुळे पुणे शहराला पाणीपुरवठा करणारे खडकवासला धरण आता अर्धे भरलं आहे. यंदा मान्सून लवकर आल्यामुळे आणि सततच्या मुसळधार पावसामुळे मे महिना संपण्यापूर्वीच खडकवासला धरण ४९ टक्के भरल्यामुळे पुणेकरांची चिंता मिटली. एप्रिल आणि मे महिन्याच्या सुरुवातीला पुणे शहरातील अनेक भागांमध्ये पाणी कपात करण्यात आली होती. मात्र आता धरण पाणलोट क्षेत्रामध्ये पाणी पातळीत वाढ होत असल्यामुळे पाणीकपातीचा निर्णय मागे घेतला जाण्याची शक्यता आहे.

गेल्या काही दिवसांपासून पुणे जिल्ह्यासह घाटमाथ्यावर तसेच धरण पाणलोट क्षेत्रामध्ये मुसळधार पाऊस पडत आहे. याचा थेट फायदा पुणे शहराला झाला आहे. कारण पुणे शहराला पाणीपुरवठा करणाऱ्या धरणांच्या पाणीसाठ्यामध्ये वाढ झाली आहे. एप्रिल मे महिन्यात पुणेकरांवर पाणी कपातीची टांगती तलवार असताना महापालिकेने शहरातील काही भागांमध्ये पाणी कपातीचा निर्णय घेतला होता. मात्र आता हा निर्णय लवकरच बदलला जाण्याची शक्यता आहे.

पुणे शहरासह जिल्ह्यात मान्सूनपूर्व पाऊस तसेच मान्सूनच्या पहिल्या टप्प्यातील पाऊस मोठ्या प्रमाणावर झाल्यामुळे धरण पाणलोट क्षेत्रामध्ये पाणी पातळी वाढली. पुणे शहराला पाणीपुरवठा करणाऱ्या मुख्य धरणांपैकी एक असलेल्या खडकवासला धरणात ४८.८६ टक्के इतका पाणीसाठा आहे. म्हणजेच जवळपास हे धरण अर्धे भरले आहे. मान्सून लवकर दाखल झाल्यामुळे मे महिन्याच्या शेवटच्या आठवड्यातच हे धरण अर्धे भरल्यामुळे पुणेकरांमध्ये आनंदाचे वातावरण आहे.