Raj Thackeray: पुण्यात मनसे निवडणूक लढणार; राज ठाकरेंच्या उपस्थितीत आज पदाधिकाऱ्यांची बैठक

Pune  : महाराष्ट्र नवनिर्माण सेनेने पुणे शहर आणि जिल्ह्यातील सर्व विधानसभा मतदारसंघांत निवडणूक लढविण्याची तयारी पूर्ण केली असून, याबाबत आज, सोमवारी पुन्हा मनसे अध्यक्ष राज ठाकरे यांच्या उपस्थितीत चर्चा होणार आहे. या चर्चेनंतर मनसेकडून काही नावांची घोषणाही होऊ शकते. दरम्यान, पुणे जिल्ह्यातील इतर पक्षातील काही नाराज उमेदवार मनसेकडून निवडणूक लढविण्यासाठी इच्छुक असल्याची माहिती आहे. त्यामुळे यंदाच्या विधानसभा निवडणुकीत मनसेचे रल्वे इंजिन रंगतदार करणार असल्याचे चित्र आहे.

मनसे अध्यक्ष राज ठाकरे यांच्या उपस्थितीत पुणे शहर आणि जिल्ह्यातील सर्व विधानसभा मतदारसंघांचा आढावा घेण्यात आला. या वेळी मनसेच्या पुण्यातील १० पदाधिकाऱ्यांचा समावेश होता. ठाकरे यांनी विधानसभानिहाय प्रत्येकाशी वैयक्तिक चर्चा करून उमेदवारांची चाचपणी केली. काही मतदारसंघासाठी इतर पक्षातील नाराज उमेदवारांच्या नावांचीही चर्चा करण्यात आली आहे. ही चर्चा बराच काळ चालल्यामुळे अंतिम निर्णय होऊ शकला नाही. त्यामुळे ठाकरे यांच्या प्रमुख उपस्थितीत आज, सोमवारी पुन्हा मुंबईत बैठक होणार आहे. त्यानंतर काही मतदारसंघांसाठी उमेदवारांची नावे जाहीर होण्याची शक्यता आहे.

Mumbai : मुंबईत अदानीसाठी जागा, मग गिरणी कामगारांसाठी का नाही, संतप्त गिरणी कामगारांचा प्रश्न, मुंबईतच पुनर्वसनाची मागणी

विधानसभा निवडणुकीत महाविकास आघाडीतील काही उमेदवारांना निवडणूक लढविण्यासाठी इच्छा असूनही, त्यांना उमेदवारी जाहीर होणार नसल्याचे चित्र आहे. त्यामुळे असे नाराज उमेदवार मनसेच्या संपर्कात आहेत. या उमेदवारांची मनसेकडून निवडणूक लढविण्याची इच्छा आहे. आमच्या बैठकीत या उमेदवारांच्या नावांबाबतही चर्चा करण्यात येत आहे. त्यामुळे लवकरच काही अनपेक्षित नावे मनसेकडून निवडणूक लढवू शकतात.

आज होणाऱ्या बैठकीनंतर निर्णय घेण्यात येईल, अशी माहिती मनसेचे सरचिटणीस राजेंद्र वागसकर यांनी दिली. राज ठाकरे यांनी पुणे जिल्ह्यातील सर्व विधानसभा मतदारसंघांत निवडणूक लढविण्याबाबत प्रत्येकाशी वैयक्तिक चर्चा केली. त्यातील प्रमुख उमेदवारांच्या नावांबाबत चर्चा झाली आहे. आज पुन्हा एकदा चर्चा होणार आहे. त्यानंतर उमेदवारांच्या नावांची घोषणा होऊ शकते, असे मनसेचे प्रवक्ते योगेश खैरे यांनी सांगितले.