PAK vs SL: पाकिस्तानच्या साहिबजादाने शतकी खेळीसह रचला विक्रम, कोहलीला टाकलं मागे

टी20 वर्ल्डकप 2026 स्पर्धेच्या सुपर 8 फेरीत श्रीलंकेविरुद्धच्या सामन्यात पाकिस्तानच्या फलंदाजांनी जबरदस्त फलंदाजी केली. हा सामना पाकिस्तानसाठी करो या मरोची लढाई आहे. हा सामना पाकिस्तानला काहीही करून 64 धावांनी जिंकायचा आहे. त्यामुळे पाकिस्तानला मोठी धावसंख्या करण्याचं आव्हान होतं. त्या दृष्टीने पाकिस्तानी फलंदाजांनी सुरुवात केली. पाकिस्तानने 20 षटकात 8 गडी गमवून 212 धावा केल्या आणि विजयासाठी 213 धावांचं आव्हान दिलं. साहिबजादा फरहान आणि फखर जमान यांनी चांगली सुरुवात केली. तसेच पाकिस्तानला 200 पार धावा करण्यास मदत केली. या जोडीने पहिल्या विकेटसाठी 176 धावांची भागीदारी केली. यात साहिबजादा फरहानची शतकी खेळी महत्त्वाची ठरली. साहिबजादा फरहानने 59 चेंडूत शतक ठोकलं. या खेळीत त्याने 9 चौकार आणि 5 षटकार मारले. यावेळी त्याचा स्ट्राईक रेट हा 166 पेक्षा जास्त होता.ट साहिबजादा फरहानने या शतकासह एक विक्रम रचला आहे. टी20 वर्ल्डकप स्पर्धेच्या एकाच पर्वात दोन शतकं ठोकणारा दुसरा फलंदाज ठरला आहे. यापूर्वी वेस्ट इंडिजच्या ख्रिस गेलने एकाच पर्वात दोन शतकं ठोकली होती. त्यानंतर आता पाकिस्तानच्या साहिबजादा फरहानचं नाव येतं. पाकिस्तानकडून एकाच पर्वात दोन शतकं ठोकणारा पहिला फलंदाज ठरला आहे. टी20 आंतरराष्ट्रीय क्रिकेटमध्ये पाकिस्तानकडून बाबर आझमने सर्वाधिक 3 शतकं ठोकली आहेत. आता या विक्रमापासून साहिबजादा फरहान एक विकेट दूर आहे. साहिबजादा फरहानने आपले शतक पूर्ण केले आणि 12 वर्षांपूर्वी भारतीय दिग्गज विराट कोहलीने बनवलेला विक्रम मोडला. साहिबजादा फरहानने एका टी20 वर्ल्डकप स्पर्धेच्या पर्वात सर्वाधिक धावा केल्या आहेत. त्याने यासह विराट कोहलीला मागे टाकलं आहे. कोहलीने 12 वर्षापूर्वी 2014 मध्ये सहा डावात 319 धावा केल्या होत्या. आता हा विक्रम साहिबजादा फरहानच्या नावावर झाला आहे. श्रीलंकेला 147 धावांवर रोखण्याचं आव्हान पाकिस्तानवर असणार आहे. कारण तसं झालं तरच पाकिस्तानला उपांत्य फेरीचं तिकीट मिळेल. त्यामुळे या सामन्यात काय होतं? याची उत्सुकता आहे. श्रीलंकेने 148 धावा केल्या तर पाकिस्तानचं स्पर्धेतील आव्हान संपुष्टात येईल.