Nagpur : नागपूर शहरात खळबळ! खेळताना ३ मुलं बेपत्ता; आज कारमध्ये आढळले मृतदेह, नेमकं काय घडलं?

Nagpur News: नागपूर शहरातून एक धक्कादायक बातमी समोर आली आहे. नागपूरातील फारुक नगर टेका परिसरातील ३ मुलांचा गाडीमध्ये गुदमरुन मृत्यू झाल्याचे उघडकीस आले आहे. ही तिनही मुले कालपासून बेपत्ता होती. अखेर त्यांचा मृतदेह आढळला असून या ह्रदयद्रावक घटनेने परिसरात एकच खळबळ उडाली आहे.

काय आहे प्रकरण?

याबाबत अधिक माहिती अशी की, नागपूर पाचपावली पोलीस ठाण्याच्या हद्दीतील टेका नाका परीसरातून शनिवारी सहा वर्षे वयोगटातील दोन मुले आणि एक मुलगी खेळताना अचानक बेपत्ता झाली. त्या तिनही चिमुकल्यांचे मृतदेहआज आढळले आहेत. या मुलांचा वाहनात गुदमरल्याने मृत्यू झाल्याची प्राथमिक माहिती पोलिसांनी दिली.

कालपासून होती बेपत्ता....

या प्रकरणामुळे पोलीस दलात एकच खळबळ उडाली आहे. मुलांमध्ये दोन भावंडे तर एक त्यांची मैत्रिण आहे. शनिवारी सायंकाळी ही तीनही मुले टेका नाकाजवळील फारुख मैदानावर खेळत होते. रात्र झाली तरीही मुले घरी न परतल्याने पालकांनी शोधाशोध केली. तसेच पोलिसांतही तक्रार केली.