Mumbai : गोळीबाराची धमकी देत पालकांकडे १ कोटींची मागणी! पाटणकर आजींनी रोहित आर्यबद्दल केला मोठा खुलासा

Mumbai : मुंबईच्या पवईमध्ये काल ओलीसनाट्य घडलं. ५० वर्षीय रोहित आर्यनं १७ मुलांना ओलीस ठेवलं. ऑडिशनच्या निमित्तानं त्यानं मुलांना एका स्टुडिओत बोलावलं होतं. स्टुडिओच्या पहिल्या मजल्यावर असलेल्या काचेतून मुलं मदतीसाठी याचना करत असल्याचं खाली असलेल्या लोकांनी पाहिलं. त्यांनी याची माहिती पोलिसांना दिली. पोलिसांनी घटनास्थळी पोहोचून मुलांना सुरक्षित बाहेर काढलं. तोपर्यंत स्टुडिओत असलेल्या मंगला पाटणकर मुलांची सुरक्षा करत होत्या. काचेचे तुकडे लागल्यानं त्यांच्या डोक्याला इजा झाली. त्या सध्या रुग्णालयात उपचार घेत आहेत.

रुग्णालयात असलेल्या मंगल पाटणकर यांनी ओलीसनाट्याचा सगळा घटनाक्रम कथन केला. 'रोहित आर्यनं काही मुलांना माझ्याकडे सोडलं आणि बाकीच्यांना वर घेऊन गेला. काही वेळानं तो खाली आला. त्यानं मला मुलांना घेऊन वर येण्यास सांगितलं. वर मुलांना काही शिकवलं जात नव्हतं. तिथल्या खिडक्यांना काळे पदडे लावलेले होते. बहुधा त्यानं आधीपासून सगळा कट रचलेला होता. त्यानं ४ मुलांच्या आई, वडिलांना फोन करायला लावले. प्रत्येकाकडून १ कोटी रुपयांची खंडणी मागितली. मला आता ४ कोटी रुपये हवेत. मी इमारतीला बॉम्ब लावले आहेत, अशी धमकी त्यानं ओलीस ठेवलेल्या मुलांना दिली,' असं पाटणकर यांनी सांगितलं.

Pune : पुण्यात धक्कादायक फसवणूक! “डिजिटल होम अरेस्ट”च्या नावाखाली १ कोटींचा घोटाळा, वृद्धाचा हृदयविकारानं मृत्यू

संपूर्ण वेळ रोहित आर्यचं वर्तन छान होतं. पण तो बऱ्याच नाट्यमय गोष्टी करत होत्या, अशी माहिती पाटणकर यांनी दिली. 'त्यानं दिवाळीचे फटाके फोडले आणि आम्हाला बाहेर गोळीबार सुरु असल्याचं सांगितलं. आम्ही बाहेर पडू नये म्हणून त्यानं ही बतावणी केली,' असं पाटणकर म्हणाल्या. 'मुलांना ओलीस ठेवण्यात आल्याची बातमी बाहेर पसरली. मला एक फोनही आला. तेव्हा मुलं माझ्यासोबत सुरक्षित असल्याचं मी त्यांना सांगितलं,' अशी माहिती पाटणकर यांनी दिली. संस्थेतील एका अन्य कर्मचाऱ्याचा यात सहभागी असावा, अशी शंका त्यांनी व्यक्त केली. तिथे असलेली एक कर्मचारी अजिबात घाबरलेली नव्हती, असं निरीक्षण पाटणकर यांनी सांगितलं.

स्टुडिओत असलेली मुलं सुरक्षित राहतील याची काळजी पाटणकरांनी घेतली. चिंतेत असलेल्या पालकांना त्यांनी मुलांचे फोटो पाठवले. पालकांच्या जीवाला घोर लागला असणार याची जाणीव पाटणकर यांना होती. त्यामुळे आत असलेल्या मुलांचे फोटो त्यांनी त्यांच्या पालकांना पाठवले. पालकांनी घाबरुन जाऊ नये या उद्देशानं पाटणकर यांनी मुलांचे फोटो पाठवले होते. पाटणकर यांनी मुलींच्या सुरक्षेकडे अधिक लक्ष दिलं. मुलांना हानी पोहोचणार नाही, याची काळजी त्यांनी घेतली.