Mumbai Crime News : अनैतिक संबंधांत पतीचा अडथळा; पत्नीनंच जेवणातून विष घालून संपवलं, २ मुलं झाली पोरकी

आरोपी महिला कविता हिचे अनैतिक संबंध होते. कविता आणि पती कमलकांत हे दोघे सांताक्रूझ परिसरातील दत्तात्रेय रोड भागातील एका सोसायटीत राहत होते. त्यांना दोन मुले आहेत. अनैतिक संबंधांमध्ये कमलकांत हा अडथळा ठरत होता. हा अडथळा कायमचा दूर करायचा असा कट महिलेने प्रियकरासोबत संगनमत करून आखला.

जूनमध्ये कवितानं प्रियकराच्या मदतीने कमलकांतच्या जेवणात विष टाकले. त्यानंतर कमलकांत याला रुग्णालयात दाखल केले होते. त्याचा उपचारादरम्यान मृत्यू झाला. पोलिसांनी सुरुवातीला अपमृत्यूची नोंद केली. सांताक्रूझ पोलीस ठाण्यात या घटनेची नोंद केली.

सांताक्रूझ पोलिसांनी तपास सुरू केला. तपास सुरू असतानाच कमलकांत याची विष देऊन हत्या केल्याची बाब समोर आली. त्यानंतर पोलिसांनी या प्रकरणी हत्येचा गुन्हा नोंदवून कविता आणि तिचा प्रियकर हितेश या दोघांना अटक केली. या प्रकरणी सांताक्रूझ पोलिसांत भारतीय दंड विधान कलम 302, 328, 120 बी यांच्याविरोधात गुन्हा नोंदवला आहे. या घटनेचा पुढील तपास सुरू आहे.