Mumbai : मध्य, पश्चिम रेल्वेवर रविवारी ब्लॉक

Mumbai : मध्य रेल्वेच्या मुंबई विभागातील आणि पश्चिम रेल्वेच्या मुंबई सेंट्रल विभागातील रेल्वे रूळ, ओव्हर हेड वायर, सिग्नल यंत्रणा यांच्या देखभाल-दुरुस्तीसाठी तसेच विविध अभियांत्रिकी कामासाठी मध्य, पश्चिम रेल्वेवर रविवारी ब्लॉक घेण्यात येणार आहे.

मध्य रेल्वेवरील माटुंगा ते मुलुंड अप आणि डाऊन जलद मार्गावर रविवारी ब्लॉक असेल. यावेळी लोकल सेवा नियोजित वेळेपेक्षा १५ मिनिटे उशिराने धावेल, असे मध्य रेल्वेकडून सांगण्यात आले आहे. पश्चिम रेल्वेवर चर्चगेट ते मुंबई सेंट्रलदरम्यान अप आणि डाऊन जलद मार्गावर ब्लॉक असेल. या कालावधीत काही लोकल फेऱ्या अंशत: रद्द आणि काही पूर्णत: रद्द होतील, असे पश्चिम रेल्वेकडून सांगण्यात आले.

मध्य रेल्वे (मुख्य मार्ग)

कुठे : माटुंगा ते मुलुंड अप आणि डाऊन जलद मार्गावर कधी : सकाळी ११.३० ते दुपारी ३.३० वाजेपर्यंत

परिणाम : ब्लॉक कालावधीत छत्रपती शिवाजी महाराज टर्मिनस येथून सुटणाऱ्या डाऊन जलद मार्गावरील लोकल सेवा माटुंगा स्थानकावर डाऊन धीम्या मार्गावर वळवल्या जातील आणि माटुंगा ते मुलुंड स्थानकांदरम्यान त्यांच्या नियोजित थांब्यांनुसार थांबतील. तर, ठाण्यापलीकडे जाणाऱ्या जलद लोकल मुलुंड स्थानकावर पुन्हा डाऊन जलद मार्गावर वळवल्या जातील. ठाणे येथून सुटणाऱ्या लोकल मुलुंड स्थानकावर अप धीम्या मार्गावर वळवल्या जातील. मुलुंड ते माटुंगा स्थानकांदरम्यान नियोजित थांब्यांनुसार थांबतील.

हार्बर मार्ग

कुठे : कुर्ला ते वाशी दरम्यान अप आणि डाऊन मार्गावर कधी : सकाळी ११.१० ते सायंकाळी ४.१० वाजेपर्यंत

परिणाम : छत्रपती शिवाजी महाराज टर्मिनस येथून सुटून पनवेल येथे जाणाऱ्या लोकल आणि पनवेल/बेलापूर/वाशी येथून सुटून छत्रपती शिवाजी महाराज टर्मिनस येथे जाणाऱ्या लोकल सेवा रद्द राहतील. ब्लॉक कालावधीत छत्रपती शिवाजी महाराज टर्मिनस ते कुर्ला आणि कुर्ला ते पनवेल/वाशी दरम्यान विशेष लोकल सेवा चालवल्या जातील. हार्बरवरील प्रवाशांना ठाणे ते वाशी/नेरुळ स्थानकांवरून सकाळी १० ते सायंकाळी ६ वाजेपर्यंत प्रवास करण्याची मुभा आहे.

पश्चिम रेल्वे

कुठे : चर्चगेट ते मुंबई सेंट्रल दरम्यान अप आणि डाऊन जलद मार्गावर

कधी : सकाळी १०.३५ ते दुपारी ३.३५ वाजेपर्यंत

परिणाम : ब्लॉक कालावधीत चर्चगेट ते मुंबई सेंट्रल दरम्यान अप आणि डाऊन जलद मार्गावरील सर्व लोकल धीम्या मार्गावर चालवण्यात येतील. यावेळी काही लोकल रद्द करण्यात येतील. तसेच चर्चगेटकडे येणाऱ्या काही लोकल वांद्रे, दादरपर्यंत चालवण्यात येतील आणि तिथूनच डाऊन मार्गाकडे वळतील.