Lok Sabha 2024 : राज्यात शिवसेना सर्वात मोठा पक्ष, काँग्रेसची शून्यापासून सुरूवात; लोकसभा जागावाटपाआधी राऊतांचा चिमटा

Lok Sabha 2024 : आगामी लोकसभा निवडणूकीच्या तयारीला सर्व राजकीय पक्षांकडून सुरूवात करण्यात आली आहे. यादरम्यान राज्यातील महाविकास आघाडीमध्ये जागावाटपावरून चढाओढ सुरू झाल्याचे पाहायला मिळत आहे. काँग्रेसचे नेते संजय निरूपम यांनी शिवसेना आणि राष्ट्रवादी काँग्रेसमध्ये झालेल्या फूटीनंतर दोन्ही पक्ष कमजोर झाल्याचं म्हटलं. तसेच माध्यामांमध्ये वक्तव्य करण्यापेक्षा एकत्र बसून चर्चा करावी असा सल्लाही दिला. यानंतर ठाकरे गटाचे नेते संजय राऊतांनी शिवसेना हा महाराष्ट्रात सर्वात मोठा पक्ष असल्याचे म्हटले आहे.

राऊतांनी आम्ही २३ जागा लढवत आलो आहोत आणि त्याबद्दल काँग्रेस हायकमांडशी चर्चा देखील सुरू असल्याचे म्हटले आहे.

Nashik Crime News : पैसे कमवण्यासाठी चोरट्यांनी लढवली अनोखी शक्कल; तपासात समोर आलेली माहिती पाहून पोलिसही चक्रावले

संजय राऊत म्हणाले की, शिवसेना महाराष्ट्रात सर्वात मोठा पक्ष आहे. काँग्रेस राष्ट्रीय पक्ष आहे. त्यांच्या राष्ट्रीय नेत्यांशी आमची बोलणी सुरू आहे. राहुल गांधी, सोनिया गांधी, खर्गे, वेणुगोपाल या निर्णय घेणाऱ्या नेत्यांशी उद्धव ठाकरे यांची चर्चा अत्यंत चांगल्या प्रकारे सुरू आहे. कोण किती जागा लढवणार याची चर्चा दिल्लीत होईल. येथे गाव-गल्लीतील लोक राष्ट्रीय स्तरावरील विषयांवर बोलत असेल तर कोण ऐकणार? असा नाव न घेता टोला देखील संजय राऊतांनी निरुपम यांना लगावला आहे.

राऊत पुढे म्हणाले की, आम्ही सांगितलं की आम्ही महाराष्ट्रात लोकसभेच्या २३ जागा लढवत आलो आहोत. या आमच्या जागा आम्ही कायम ठेवणार आहोत. राष्ट्रवादी आणि आम्ही जिंकलेल्या जागांवर नंतर बोलणी होतील असं पहिल्या आणि दुसऱ्या बैठकीत ठरवण्यात आलं होतं.

काँग्रेसने महाराष्ट्रात एकही जागा जिंकली नाहीये काँग्रेसला महाराष्ट्रात शून्यापासून सुरूवात करायची आहे. पण काँग्रेस आमचा महाविकास आघाडीचा महत्वपूर्ण साथीदार आहे. महाराष्ट्रात काँग्रेस, राष्ट्रवादी काँग्रेस, शिवसेना मिळून काम करतील. आम्हाला काही अडचण नाहीये, तसेच काँग्रेसच्या दिल्लीतील हायकमांडला देखील कुठलीच अडचण नाहीये, त्यामुळे इथे तीथे कोणी काही बोलत असेल तर लक्ष देण्याची अवश्यकता नाही, असेही संजय राऊत म्हणाले.