Kalyan Crime News : तहान लागल्याने पाणी प्यायला गेली, नराधमानं संधी साधली; कल्याणमध्ये अल्पवयीन मुलीवर लैंगिक अत्याचार

Kalyan Crime News : कल्याणमध्ये एका अल्पवयीन मुलीवर लैंगिक अत्याचार झाल्याची घटना समोर आली आहे. याप्रकरणी बाजारपेठ पोलिसांनी नराधमाला बेड्या ठोकल्या आहेत. एका बारा वर्षीय अल्पवयीन  मुलीवर लैंगिक अत्याचार झाल्याची घृणास्पद घटना कल्याणमध्ये उघडकीस आली आहे. या घटनेमुळे शहरामध्ये संताप व्यक्त केला जात आहे.

याप्रकरणी कल्याण बाजारपेठ पोलिसांनी अकदस चंदू नावाच्या नराधमाला अटक केली आहे . धक्कादायक म्हणजे अकदसने वर्षभरापूर्वी देखील एका अल्पवयीन मुलीसोबत असा प्रकार केला होता. या नराधमाविरोधात कठोर कारवाई करण्याची मागणी केली जात आहे. घटनेमुळे नागरिकांमध्ये भीतीचं वातावरण निर्माण झालं  आहे.

कल्याणमध्ये राहणारी एक बारा वर्षीय अल्पवयीन मुलगी रात्री साडे सात वाजण्याच्या सुमारास दुकानात केक घेण्याकरता गेली होती. तिला तहान लागली म्हणून ती मुलगी जवळच पाणी पिण्यासाठी गेली. तेवढ्यात तिच्या पाठीमागून एक व्यक्ती आला. त्याने त्या मुलीचे तोंड दाबले. तिला जबरदस्तीने एका ठिकाणी घेऊन गेला. त्याने या मुलीसोबत अतिप्रसंग करायला सुरुवात केली.

या प्रकारामुळे घाबरलेल्या पीडित मुलीने आरडाओरड सुरू केली. त्यामुळे नराधमाने तेथून पळ काढला. त्यानंतर मुलीने देखील तेथून पळ काढत घर गाठले. अकदस चंदू असं, या नराधमाचं नाव आहे. पीडित मुलीच्या कुटुंबीयांनी या प्रकरणी कल्याण बाजारपेठ पोलीस ठाण्यात तक्रार  नोंदवली आहे. या तक्रारीनुसार पोलिसांनी तत्काळ गुन्हा दाखल केला आहे. तसंच अकदस चंदू या आरोपीला बेड्या ठोकल्या. धक्कादायक म्हणजे आरोपीचा खाद्यपदार्थ विक्रीचा व्यवसाय आहे. त्याने अकदस चंदू याने वर्षभरापूर्वी देखील एका मुलीसोबत असाच प्रकार केल्याचे देखील उघडकी आलं आहे.