Jalna Accident : दुर्दैवी! शॉपिंग करून मॉलबाहेर पडले अन् अनर्थ घडला; कारच्या धडकेत ३ चिमुकल्यांचा मृत्यू

Jalna : जालनामध्ये दुचाकी आणि कारच्या अपघातामध्ये तीन चिमुकल्यांचा दुर्दैवी मृत्यू झाल्याची धक्कादायक घटना समोर आली आहे. मॉलमध्ये शॉपिंग  करुन घराच्या दिशेने जात असताना हा अपघात झाला आहे. जालना शहरातील मंठा-अंबड बायपास मार्गावरील रेल्वे उड्डाणपुलावर ही घटना घडली आहे. या अपघाताचा तपास पोलिसांकडून सुरु आहे.

मिळालेल्या माहितीनुसार,जालना शहरातील अंबड चौफुली ते मंठा चौफुली दरम्यानच्या रेल्वे उड्डान पुलावर हा भीषण अपघात झाला. कारने दुचाकीला जोरदारच्या धडक दिली. या अपघातामध्ये तीन मुलांचा जागीच मृत्यू झाला तर दोघे जण गंभीर जखमी झाले. नागरिकांनी तात्काळ जखमींना उपचारासाठी रुग्णालयामध्ये दाखल केले. या अपघातामध्ये नुरेन फातेमा सादेक शेख (7 वर्षे), आयेजा फातेमा सादेक शेख (5 वर्षे), अदाबिया फातेमा सय्यद शोएब (9 वर्षे) यांचा मृत्यू झाला. तर सय्यद शोएब आणि अन्य एक मुलगा जखमी झाला आहे.

रविवारची सुट्टी असल्याने तट्टूपुरा मुजाहेद चौक येथे राहणारे सय्यद शोएब हे आपल्या मुलांसोबत दोन भाच्यांना मोतीबागेत खेळण्यासाठी घेऊन गेले होते. या मुलांचे खेळून झाल्यानंतर ते शॉपिंगसाठी त्यांना मॉलमध्ये घेऊन गेले.

शॉपिंग झाल्यानंतर ते संध्याकाळी साडेसातच्या सुमारास मॉलमधून बाहेर पडले आणि दुचाकीवरुन घराकडे जात होते. त्याचवेळी रेल्वे उड्डाण पुलावर त्यांच्या दुचाकीला पाठीमागून येणाऱ्या कारने जोरदार धडक दिली. या अपघातात सर्वजण रस्त्यावर पडले. या अपघातामध्ये तीन चिमुकल्यांचा जागीच मृत्यू झाला. तर सय्यद शोएब आमि एक मुलगा जखमी झाला.

सय्यद शोएब यांच्या डोळ्यासमोरच त्यांची मुलगी आणि दोन भाच्यांचा दुर्दैवी मृत्यू झाल्याने परिसरात हळहळ व्यक्त केली जात आहे. या अपघातानंतर कार चालक घटनास्थळावरुन फरार झाला. अपघातामध्ये सय्यद शोऐब आणि एक मुलगा हे किरकोळ जखमी झाले असून त्यांच्यावर जालन्यातील खासगी रुग्णालयात उपचार सुरू आहेत. सय्यद शोऐब यांच्या घरावर शोककळा पसरली आहे. या घटनेमुळे एकच हळहळ व्यक्त केली जात आहे. जालना पोलीस या अपघाताचा तपास करत आहेत.