Buldhana Political Twist

Buldhana : बुलढाण्यातील खामगाव कृषी उत्पन्न बाजार समितीत अजित पवारांच्या राष्ट्रवादीला मोठा धक्का बसला आहे. कृषी उत्पन्न बाजार समितीतील स्थानिक नेत्यांच्या राजकारणाला कंटाळून राष्ट्रवादीच्या अजित पवार गटाच्या सभापतींवर अविश्वास प्रस्ताव दाखल करण्यात आला आहे.

बाजार समितीमधील 18 पैकी 13 सदस्यांनी जिल्हाधिकाऱ्यांकडे अविश्वास प्रस्ताव दाखल करून अज्ञातवासात गेले. काँग्रेस नेत्याने आणलेल्या अविश्वास प्रस्तावाला भाजपची साथ असल्याचा आरोप करण्यात आला आहे. स्थानिक स्वराज्य संस्थांच्या निवडणुकीपूर्वी खामगावात राजकीय वातावरणात मोठी खळबळ उडाली आहे.

Pune : PSI चा गैरवर्तनाचा धक्कादायक प्रकार; लाच मागितल्याने कायदा व्यवस्थेत खळबळ!

मिळालेल्या माहितीनुसार, पश्चिम विदर्भात सर्वात मोठी बाजारपेठ असलेल्या खामगाव येथील कृषी उत्पन्न बाजार समितीत सध्या अजित पवार गटाच्या राष्ट्रवादी काँग्रेसची सत्ता होती. तर स्थानिक राष्ट्रवादीचे नेते दिलीप कुमार सानंदा यांच्या मार्गदर्शनाखाली कृषी उत्पन्न बाजार समितीचा कारभार चालत होता.

या कृषी उत्पन्न बाजार समितीत एकूण १८ सदस्य आहेत. तर सुभाष पेसोडे हे राष्ट्रवादीचे सभापती आहेत. मात्र आज खामगावच्या राजकारणात मोठे खळबळ होत 18 पैकी 13 सदस्य हे काँग्रेसच्या ज्ञानेश्वरदादा पाटील यांच्या नेतृत्वात एकत्र येऊन जिल्हाधिकाऱ्यांना भेटून अविश्वास प्रस्ताव दाखल करून अज्ञात वासात निघून गेले.

येत्या 14 तारखेला या अविश्वासावर मतदान होणार आहे. अविश्वास प्रस्ताव पारित होऊन आता भाजपच्या साथीने काँग्रेसची सत्ता या बुलढाणा जिल्ह्यातील सर्वात मोठ्या कृषी उत्पन्न बाजार समितीवर येण्याची शक्यता आहे. त्यामुळे बुलढाणा जिल्ह्यातील राजकारण ढवळून निघाला आहे.