BMC Election : ठाकरेंच्या ५ उमेदवारांचे अर्ज बाद? शिंदेसेनेचा ‘डिजिटल’ आक्षेप; ओळीनं विकेट पडण्याची शक्यता

Mumbai : मुंबई महापालिका निवडणुकीसाठी उमेदवारांनी दाखल केलेल्या अर्जांची छाननी सुरु आहे. पश्चिम उपनगरातील मालाडमध्ये ठाकरेसेनेची धाकधूक वाढली आहे. मालाड पूर्वेतील ईशान्य विभागातील निवडणूक कार्यालयात अर्जांची छाननी करण्यात येत आहे. शिंदेसेनेनं ठाकरेंच्या पाच उमेदवारांच्या अर्जावर आक्षेप घेतला आहे. त्यामुळे प्रभाग क्रमांक ३८, ३९, ४०, ४१ आणि ४२ मध्ये ठाकरेंच्या उमेदवारांचे अर्ज धोक्यात येण्याची दाट शक्यता आहे.

निवडणूक कार्यालयात उमेदवारांच्या अर्जाची छाननी सुरु आहे. शिवसेना उबाठाच्या उमेदवारांच्या एबी फॉर्मवर डिजिटल स्वाक्षरी सही असल्याचं लक्षात आलं आहे. त्यावर शिंदेसेनेचे विभागप्रमुख वैभव भरडकर यांनी आक्षेप घेतला आहे. यासाठी निवडणूक आयोगाच्या कायद्यावर बोट ठेवण्यात आलं आहे. पक्षाच्या एबी फॉर्मवर प्रत्यक्ष स्वाक्षरी गरजेची असते. डिजिटल स्वाक्षरीमुळे ठाकरेंच्या उमेदवारांचे अर्ज बाद होऊ शकतात. या प्रकरणात निवडणूक अधिकाऱ्यांनी लेखी तक्रार स्वीकारत कारवाईचं आश्वासन दिलं आहे.

Pune : भाजप–शिंदेसेनेला धक्क्यांवर धक्के! पिंपरीत ५ उमेदवारांचं चिन्ह गुल, पुढची वाट अधिकच बिकट

एकीकडे ठाकरेंचे पाच उमेदवार गोत्यात आलेले असताना, प्रभाग क्रमांक ३८ ते ४२ या ओळीनं असलेल्या जागा धोक्यात आलेल्या असताना दुसरीकडे प्रभाग क्रमांक २११ आणि २१२ मध्ये महायुतीला धक्का बसला आहे. कागदपत्रांची पूर्तता न केल्यानं प्रभाग क्रमांक २११ मधील शिंदेसेनेच्या उमेदवाराचा अर्ज फेटाळला गेला आहे. तर प्रभाग क्रमांक २१२ मध्ये भाजपच्या मंदाकिनी खामकर यांचा अर्जही बाद झाला आहे. खामकर या एबी फॉर्म मिळाल्यावर उमेदवारी अर्ज दाखल करण्यासाठी निवडणूक कार्यालयात उशिरा पोहोचल्या. त्यांना १५ मिनिटं विलंब झाला. त्यामुळे त्यांचा अर्ज बाद झाला.

प्रभाग क्रमांक २१२ मधून भाजपच्या उमेदवार बाद झाल्यानं मनसेच्या उमेदवार श्रावणी हळदळकर यांचा विजय निश्चित मानला जात आहे. या प्रभागात अखिल भारतीय सेनेच्या गीता गवळी, काँग्रेस आणि अन्य पक्षांचे उमेदवार निवडणूक आखाड्यात आहेत. पण ठाकरे बंधूंची एकत्रित ताकद पाहता हळदणकर यांच्या विजयाची शक्यता जास्त आहे. त्यामुळे प्रभाग क्रमांक २१२ मधून मनसेचं खातं उघडू शकतं.