Beed News : धक्कादायक! राष्ट्रवादी शरद पवार गटाच्या पदाधिकाऱ्याची गाडी पेटवण्याचा प्रयत्न; बीडमध्ये खळबळ

Beed News : बीडमधून एक मोठी बातमी समोर आली आहे. राष्ट्रवादी शरद पवार  गटाचे आष्टी-पाटोदा-शिरूर विधानसभा मतदार संघातील स्थानिक पदाधिकारी तसेच सामाजिक कार्यकर्ते राम खाडे यांची गाडी पेट्रोल टाकून जाळण्याचा प्रयत्न झाला. ही घटना गुरुवारी मध्यरात्री कन्हेवडगाव येथे घडली असून गाडी पेटवतानाचा व्हिडिओ सीसीटीव्ही कमेऱ्यात कैद झाला आहे.

याबाबत सविस्तर माहिती अशी की, बीडच्या आष्टी तालुक्यातील कन्हेवडगाव येथे राम खाडे यांनी राहत्या घरासमोर, स्कॉर्पिओ गाडी (क्र. एमएच 23, एएस 3044) उभी केली होती. मध्यरात्री 1 वाजता 4 अज्ञात तरुण तोंडाला रुमाल बांधून घराजवळ आले. त्यांनी गाडीवर पेट्रोल टाकून गाडी पेटवून दिली. त्यानंतर काचावर दगड मारले.

Maharashtra Bhushan Award : अशोक सराफ हे मराठी मातीतला अस्सल हिरा: मुख्यमंत्री शिंदे

आवाज होताच टवाळखोर पळून गेले. दुसरीकडे खाडे यांचे बंधू बाहेर आले. त्यांनी कुटुंबियांना उठवले आणि गाडीवर पाणी टाकून आग नियंत्रणात आणली. हा संपूर्ण घटनाक्रम सीसीटीव्ही कॅमेऱ्यात कैद झाला आहे.

या प्रकरणी आष्टी पोलीस ठाण्यात अज्ञाताविरोधात गुन्हा दाखल झाला आहे. दरम्यान राम खाडे यांनी भाजप आमदार सुरेश धस , त्यांची पत्नी प्राजक्ता धस यांच्यावर संशय व्यक्त केला असून तशी नोंद देखील पोलीस ठाण्यातील एफआयआरमध्ये आहे. याप्रकरणी पोलीस सध्या अधिक तपास करत आहेत.