श्वानाला सोसायटीच्या टेरेसवर फिरायला नेल्याच्या रागातून महिलेला मारहाण; नऱ्हे भागातील घटनेत पाच जणांवर गुन्हा

श्वानाला सोसायटीच्या टेरेसवर फिरायला नेल्याच्या रागातून महिलेला लाथा-बुक्क्यांनी मारहाण करून तिचा विनयभंग केल्याची घटना नऱ्हे येथील श्री होम्स सोसायटीमध्ये घडली. या प्रकरणी सोसायटीतील एकाच कुटुंबातील पाच जणांवर गुन्हा दाखल करण्यात आला आहे.
या प्रकरणी एका ४० वर्षीय महिलेने सिंहगड रस्ता पोलीस ठाण्यात तक्रार दिली आहे. पोलिसांनी दिलेल्या माहितीनुसार, फिर्यादी महिला कोढवा परिसरात राहते. महिलेकडे रेना नावाची एक कुत्री आहे. तिला घेऊन शनिवारी ही महिला आपल्या आईच्या घरी श्री होम्स सोसायटीमध्ये आली होती. तिने श्वानाला सोसायटीच्या टेरेसवर फिरायला नेले होते. मात्र, तत्पूर्वी सोसायटीतील एका कुटुंबाने या महिलेला तसे करण्यास विरोध केला होता. कुत्र्यांना टेरेसवर फिरायला घेऊन जायचे नाही, असे बजावण्यात आले होते. त्यावरून त्यांच्यात वाद निर्माण झाला होता. त्यातून या कुटुंबाने कुत्रीला झाडूने मारले आणि त्याचा व्हिडिओ सोशल मिडियावर टाकला. हा व्हिडिओ पाहिल्यानंतर संबंधित महिला जाब विचारण्यासाठी या कुटुंबाच्या घरी गेली. तेव्हा तिला शिवीगाळ करण्यात आली आणि लाथा-बुक्क्यांनी मारहाणही करण्यात आली.
सिंहगड रस्ता पोलिसांनी याप्रकरणी गुन्हा दाखल केला असून, पोलीस उपनिरीक्षक काळे अधिक तपास करीत आहेत.