Baramati Crime : रात्रीचा थरार! कोयत्याने हल्ला करणाऱ्या टोळीवर पोलिसांचा पलटवार; प्रवाशांना अडवून लुटमार करणाऱ्यांचा खाकीने केला करेक्ट कार्यक्रम

Baramati : भिगवण-बारामती रोडवरील जैनकवाडी फाटा येथे रात्रीच्या वेळी कोयता व लोखंडी दांडक्याचा धाक दाखवत कार अडवून प्रवाशांवर प्राणघातक हल्ला करून जबरदस्तीने चोरी केल्याची धक्कादायक घटना घडली आहे. या प्रकरणी बारामती तालुका पोलीस ठाण्यात ६ ते ७ अनोळखी इसमांविरोधात गुन्हा दाखल करण्यात आला आहे.

जैनकवाडी फाट्याजवळ प्रवाशांना अडवून मारहाण व लूटमार
फिर्यादी विश्वराजे चंद्रशेखर पाटील व त्यांचे सहकारी मारुती सुझुकी कॅरी गाडीतून प्रवास करत असताना, जैनकवाडी फाट्याजवळ ६ ते ७ अनोळखी इसमांनी अचानक गाडी अडवली. हल्लेखोरांनी गाडीच्या काचा फोडून कोयता व लोखंडी दांडक्याचा धाक दाखवत दहशत निर्माण केली. यावेळी फिर्यादीच्या डोक्यावर कोयत्याने वार करून जखमी करण्यात आले. या हल्ल्यात फिर्यादीची बॅग, मोबाईल फोन, चार्जिंग पॉवर बँक, एटीएम कार्ड व रोख रक्कम असा एकूण १२ हजार २० रुपयांचा मुद्देमाल हल्लेखोरांनी लुटून नेला.

पोलीस निरीक्षक चंद्रशेखर यादव यांच्याकडून तातडीने शोधमोहीम
टोळी धुडगूस घालत असल्याची माहिती होमगार्ड जवान सूर्यवंशी यांनी दिल्यानंतर, पोलीस निरीक्षक चंद्रशेखर यादव यांनी तातडीने घटनास्थळी धाव घेतली. घटनेचे गांभीर्य ओळखून त्यांनी आरोपींचे वर्णन व वाहनांच्या आधारे शोधमोहीम सुरू केली. याबाबत भिगवण, दौंड व यवत पोलीस ठाण्यांना सतर्क करण्यात आले.

केडगाव चौफुला-सुपा रोडवर थरारक पाठलाग अन् अटक
मोटारसायकल व रिक्षाच्या मदतीने पळणाऱ्या आरोपींचा केडगाव चौफुला-सुपा रोडवर थरारक पाठलाग करण्यात आला. पोलिसांनी सखोल शोधमोहीम राबवत पाचपैकी चार आरोपींना ताब्यात घेण्यात यश मिळवले, तर एक आरोपी फरार आहे. या आरोपींनी कुरकुंभ येथील पेट्रोल पंपावरील सेल्समन रवींद्र महेश खडके यांच्यावर सुद्धा कोयत्याने गंभीर वार केला होता.

पुण्यातील चार आरोपी जेरबंद; शस्त्रे व मुद्देमाल जप्त
अटकेतील आरोपींकडून तीन धारदार कोयते, एक मोठा बेसबॉल रॉड तसेच चोरी गेलेला मुद्देमाल जप्त करण्यात आला आहे. यामध्ये कृष्णा राजू मोरे (मार्केट यार्ड), रुपेश सुरेश आडवाल (कात्रज), संकेत अनंत शिलते (पर्वती दर्शन) आणि ईश्वर महादेव मिसाळ (कात्रज) या आरोपींना अटक करण्यात आली आहे.

पोलीस प्रशासन व स्थानिक नागरिकांच्या समन्वयातून कारवाई
ही कारवाई पोलीस अधीक्षक संदीप सिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी सुरेश राठोड यांच्या मार्गदर्शनाखाली पोलीस निरीक्षक चंद्रशेखर यादव व त्यांच्या टीमने केली. या संपूर्ण कारवाईत यवत व भिगवण पोलीस स्टेशनच्या पथकांसह निरगुडे, भिगवण आणि कुरकुंभ परिसरातील स्थानिक नागरिकांनी आरोपी शोधण्यात मोलाचे सहकार्य केले.