Akola Accident : वणी रंभापुरजवळ अपघात, कारचा चूराडा; मदत करणा-यांची मने हेलावली

Akola Accident : अकोला राष्ट्रीय महामार्गावर बोरगाव मंजू पोलिस ठाण्याच्या हद्दीत वणी रंभापुर नजीक अज्ञात वाहनाच्या धडकेत कारचा चुराडा झाला आहे. तर या कारमधील तीन प्रवासी गंभीर जखमी झाले आहेत. हा भीषणअपघात आज (गुरुवार) दुपारी घडली. 

घटनास्थळावरुन मिळालेल्या माहितीनुसार अकोलाहून मुर्तिजापूरच्या दिशेने जाणा-या कारचा वणी रंभापुर ते पैलपाडा कॅनाल नजीक अपघात झाला. या अपघातात कारचा चुराडा झाला आहे. यावेळी घटनास्थळी अपघातग्रस्तांना मदत करण्यासाठी रस्त्यावरील नागरिकांनी धाव घेतली. 

या घटनेची माहिती मिळताच घटनास्थळी माॅ चंडिका माता आपत्कालीन व्यवस्थापन पथक, वन्दे मातरम् आपत्कालीन व्यवस्थापन पथक कुरणखेड यांनी घटनास्थळी धाव घेतली. या सर्वांनी मिळून कारममध्ये अडकलेल्या तिघांना शर्थीचे प्रयत्न करुन काढले. या जखमींना अकोला येथील शासकीय रुग्णालयात दाखल करण्यात आले आहे. या अपघातात चालक जानसन वाघमारे, अनिल सुखदेव चराटे आणि लता सुखदेव चराटे हे तिघे जखमी झाल्याची माहिती पाेलिसांनी दिली.