Pune : बारामतीतील रुग्णालयाला अजित पवारांचे नाव देण्याचा निर्णय; अहिल्यादेवी होळकरांचे नाव वगळण्याची शक्यता, वादाची चिन्हे

Pune : पुणे जिल्ह्यातील बारामती येथील शासकीय वैद्यकीय रुग्णालय; तसेच शासकीय आयुर्वेद महाविद्यालय व रुग्णालयाचे नामकरण ‘स्व. अजित (दादा) पवार’ यांच्या नावाने करण्यास राज्य सरकारने मान्यता दिली आहे. या नामकरणानंतर संबंधित संकेतस्थळे, अभिलेखे, नोंदवही, फलक, अधिकृत पत्रव्यवहार व इतर कागदपत्रांमध्ये आवश्यक ते बदल करण्याची जबाबदारी वैद्यकीय शिक्षण व संशोधन संचालनालय, मुंबईचे आयुक्त; तसेच संबंधित संस्थांचे अधिष्ठाता यांच्यावर सोपवली आहे.

वैद्यकीय शिक्षण व औषधी द्रव्ये विभागाच्या तीन जानेवारी २०१३च्या शासन निर्णयान्वये बारामती येथे १०० विद्यार्थी प्रवेश क्षमतेचे शासकीय वैद्यकीय महाविद्यालय आणि ५०० रुग्णखाटांचे संलग्नित रुग्णालय स्थापन करण्यास मान्यता दिली होती. त्यानंतर २० जुलै २०२१ रोजीच्या शासन निर्णयानुसार १०० विद्यार्थी प्रवेश क्षमतेचे शासकीय आयुर्वेद महाविद्यालय आणि १०० रुग्णखाटांचे आयुर्वेद रुग्णालयही सुरू करण्यात आले.

यापूर्वी ३१ मे २०२३ रोजीच्या शासन निर्णयान्वये शासकीय वैद्यकीय महाविद्यालयाचे नामकरण ‘पुण्यश्लोक अहिल्यादेवी होळकर शासकीय वैद्यकीय महाविद्यालय, बारामती’ असे केले होते. ते आता बदलून अजित पवार यांचे नाव त्यास दिले जाईल. या नव्या निर्णयाने वाद निर्माण होण्याची शक्यता असून काही संघटनांकडून नाव बदलण्याच्या निर्णयाला आक्षेप घेण्यात आला आहे.

संशोधन केंद्राचेही बदलले नाव

राहुरी येथील महात्मा फुले कृषी विद्यापीठातील देशी गाय संशोधन व प्रशिक्षण केंद्राचे नामकरण ‘अजितदादा पवार देशी गाय संशोधन व प्रशिक्षण केंद्र’ असे करण्यास मान्यता दिल्याचे कृषिमंत्री दत्तात्रय भरणे यांनी जाहीर केले. देशी गायींचे संगोपन व संवर्धन; तसेच दूध व दुग्धजन्य उत्पादने, गोमूत्र आणि शेण प्रक्रियेवरील संशोधनासाठी हे केंद्र कार्यरत आहे.

‘अजितदादांच्या संकल्पनेतून या केंद्राची स्थापना झाली होती. या केंद्राच्या सक्षमीकरणासाठी राज्य सरकारकडे निधीची शिफारस करण्यात आली असून, ५६ कोटी रुपये उपलब्ध होतील,’ असे भरणे यांनी सांगितले.