Ahilyanagar : आईसमोरच सख्ख्या भावाची निर्घृण हत्या; बापाच्या मदतीने मृतदेह गोणीत भरून घाटात फेकला—कारण ऐकून पोलिसही हादरले

Ahilyanagar : जिल्ह्यातील डोंगरगण परिसरातील वांबोरी घाटात दोन दिवसांपूर्वी गोणीत भरलेला मृतदेह आढळल्याने मोठी खळबळ उडाली होती. आता या गुन्ह्याचा उलगडा झाला असून, स्थानिक गुन्हे शाखेच्या चौकशीत त्याच्या सख्ख्या भावाचा आणि वडिलांचा यामागे हात असल्याचे समोर आले आहे. सख्ख्या भावाचा खून करून मृतदेहाची अमानुष पद्धतीने विल्हेवाट लावणाऱ्या बाप-लेकांना स्थानिक गुन्हे शाखेच्या पोलिसांनी अटक केली आहे.

मुलाचा मृतदेह लपवायला बापाने केली मदत
सुरुवातीला मृतदेहाची ओळख पटवणे हे पोलिसांसमोर मोठे आव्हान होते. मात्र स्थानिक गुन्हे शाखेने तांत्रिक तपास, गुप्त माहिती आणि चौकशीच्या आधारे तपासाची चक्रे वेगाने फिरवत अवघ्या दोन दिवसांत या थरारक हत्येचा उलगडा केला. मृत व्यक्तीची ओळख किरण शिवाजी कवाने अशी पटली असून, त्याचा खून त्याचाच सख्खा भाऊ योगेश शिवाजी कवाने याने केल्याचे निष्पन्न झाले आहे. धक्कादायक म्हणजे, हत्येनंतर पुरावा नष्ट करण्यासाठी वडील शिवाजी शंकर कवाने यांनी देखील मदत केल्याचे उघड झाले. पोलिसांनी बाप-लेक दोघांनाही अटक केली आहे.

घरगुती वादातून केली हत्या
मयत किरण हा दारूच्या नशेत वारंवार आई-वडिलांना मारहाण करत असे. कुटुंबीयांनी त्याला समज देण्याचे आणि व्यसनमुक्त करण्याचे प्रयत्न केले होते. मात्र त्याच्या वागण्यात कोणताही बदल झाला नाही. घटनेच्या दिवशीही तो दारूच्या नशेत घरात धिंगाणा घालत असताना भाऊ योगेश यांच्याशी वाद झाला. या वादातून संतापाच्या भरात योगेशने किरणचा गळा दाबून हत्या केल्याची कबुली दिली आहे. हत्या केल्यानंतर पुरावा नष्ट करण्यासाठी मृतदेह गोणीत भरून वांबोरी घाटात टाकण्यात आला. आरोपींनी मृतदेहावर एक नव्हे तर दोन गोण्या चढवून मधून शिवण घालून तो दरीकाठावर फेकल्याचे तपासात समोर आले. या क्रूर प्रकारामुळे परिसरात भीतीचे वातावरण निर्माण झाले होते.

पोलिसांची वेगवान कारवाई केली अहिल्यानगर जिल्ह्यातील या प्रकरणात स्थानिक गुन्हे शाखेच्या पथकाने वेगाने तपास करत आरोपींपर्यंत पोहोचून दोघांना अटक केली आहे. सध्या पुढील तपास सुरू असून या घटनेमुळे नातेसंबंधातील हिंसाचाराचा गंभीर प्रश्न पुन्हा ऐरणीवर आला आहे. नात्यांवरच कुरघोडी करणाऱ्या या खूनकांडाने जिल्हा हादरला असून, संताप आणि धक्क्याची लाट उसळली आहे.