नीट पेपरफुटीचा महास्फोट! लातूरच्या 'एम-सर' शिवराज मोटेगावकर यांना सीबीआयची अटक; मोबाईलमध्ये सापडली प्रश्नपत्रिका!

  लातूर :देशभरात खळबळ उडवून देणाऱ्या 'नीट' (NEET) परीक्षा पेपरफुटी प्रकरणात आता लातूरचे कनेक्शन उघड झाले आहे. लातूरमधील प्रसिद्ध 'रेणुका केमिस्ट्री क्लासेस' (RCC) चे संचालक आणि 'एम-सर' म्हणून ओळखले जाणारे प्राध्यापक शिवराज मोटेगावकर यांना केंद्रीय अन्वेषण विभागाने (CBI) अटक केली आहे.

नेमकं काय घडलं?

सीबीआयने गेल्या काही दिवसांपासून लातूरमध्ये तळ ठोकला होता. शिवराज मोटेगावकर यांची सलग ११ तास कसून चौकशी केल्यानंतर सीबीआयच्या हाती महत्त्वाचे धागेदोरे लागले. सीबीआयने जेव्हा त्यांच्या मोबाइलची तपासणी केली, तेव्हा त्यामध्ये २३ एप्रिल २०२६ रोजी पार पडलेल्या 'नीट' परीक्षेची अधिकृत प्रश्नपत्रिका सापडली. ही प्रश्नपत्रिका आणि उत्तरतालिका (Answer Key) परीक्षा होण्यापूर्वीच त्यांच्याकडे आली होती, असा संशय सीबीआयने व्यक्त केला आहे.

मोठा रॅकेटचा पर्दाफाश:

तपासात असे समोर आले आहे की, मोटेगावकर हे एका मोठ्या आंतरराज्यीय टोळीचे सक्रिय सदस्य आहेत. ते इतर आरोपींच्या संगनमताने परीक्षेचे गोपनीय साहित्य मिळवून ते पुढे काही निवडक व्यक्तींना वाटत असत. विशेष म्हणजे, ज्या शिक्षकाने २०२४ मध्ये पेपरफुटीच्या विरोधात न्यायालयात याचिका दाखल केली होती, तोच शिक्षक आज स्वतः पेपरफुटीच्या गुन्ह्यात मुख्य सूत्रधार म्हणून अडकला असल्याने शिक्षण क्षेत्रात मोठी खळबळ उडाली आहे.

आणखी खुलासे:

या प्रकरणाचा तपास आता अधिक गडद होत असून, लातूरमधील डॉक्टर मनोज शिरूरे यांच्या फ्लॅटवर चालणारे 'विशेष क्लासेस' आणि त्यातील आर्थिक गैरव्यवहार, तसेच मोटेगावकर यांच्या लपवलेल्या बँक लॉकर्समधील गुपिते उलगडण्यासाठी सीबीआय आणि ईडी (ED) कडून अधिक सखोल तपास केला जात आहे. या अटकेनंतर सोलापूर आणि इतर ठिकाणच्या 'आरसीसी'च्या शाखा अचानक बंद झाल्या असून, विद्यार्थ्यांमध्ये मोठा संभ्रम निर्माण झाला आहे.