राहुल गांधींच्या सावरकरांवरील विधानावरून मनसे आक्रमक; मनसैनिकांना शेगावात पोहोचण्याचे राज ठाकरेंचे निर्देश

काँग्रेस खासदार राहुल गांधी यांनी भारत जोडो यात्रेदरम्यान स्वातंत्र्यवीर सावरकर यांच्यावर केलेल्या टीकेचे पडसाद आता राज्यभर उमटत आहेत. सावरकरांच्या मुद्द्यावरून भाजपा-शिंदे गट आणि ठाकरे गटात टीका टीप्पणी सुरू असताना यावरून आता मनसेही आक्रमक झाल्याचे बघायला मिळते आहे. अशाच भारत जोडो यात्रा उद्या बुलढाणा जिल्ह्यातील शेगाव येथे पोहोचणार आहे. याठिकाणी राहुल गांधी यांची जाहीर सभाही आयोजित करण्यात आली आहे. त्यामुळे राहुल गांधींना प्रत्युत्तर देण्यासाठी आता राज्यभरातील मनसैनिकांना शेगाव पोहोचण्याची निर्देश राज ठाकरे यांनी दिले असल्याची माहिती पुढे आहे. यासंदर्भात मनसे नेते संदीप देशपांडे यांनीही प्रतिक्रिया दिली आहे.

“राहुल गांधींकडून ज्या पद्धतीने स्वातंत्रवीर सावरकरांचा अपमान करण्याचा प्रयत्न होतो आहे. हे कोणाला न पटण्यासारखं आहे. हे कुठं तरी थांबवण्याची गरज आहे. त्यामुळे उद्या राज्यभरातून मनसैनिक हे शेगाव येथे पोहोचणार आहेत. यावेळी त्यांच्या सभेच्या ठिकाणी जाऊन आम्ही आमचा निषेध नोंदवू. मनसेची निषेध नोंदवण्याची एक पद्धत आहे. यावेळी केवळ काळे झेंडे आम्ही दाखवणार नाही, आमचा निषेध कसा असतो, हे उद्या शेगावमध्ये सर्वांना बघायला मिळेल”, अशी प्रतिक्रिया संदीप देशपांडे यांनी दिली आहे.

“आम्हाला कायदा सुव्यवस्था बिघडवायची नाही. मात्र, तुम्ही तोंडावर ताबा ठेवणार नसाला, तर कायदा सुव्यवस्था राखण्याची जबाबदारी तुमची आहे. तुम्ही महाराष्ट्रात येता आणि आमच्या महापुरुषांबाबत वाटेल तो बोलता, हे आम्ही सहन करणार नाही. तुम्ही अशाप्रकार सावरकरांचा अपमान करणार असाल, तर निश्चितपणे तुम्हाला धडा शिकवला जाईल”, असेही ते म्हणाले.

दरम्यान, राहुल गांधी यांची भारत जोडो यात्रा सध्या महाराष्ट्रातून भ्रमण करते आहे. दरम्यान, मंगळवारी ही यात्रा वाशिमध्ये असताना राहुल गांधी यांनी स्वातंत्र्यवीर सावरकर यांच्यावर टीका केली होती. “सावरकर दोन-तीन वर्षे अंदमानच्या तुरुंगात होते. यावेळी त्यांनी इंग्रजांना माफीनामे पाठवायला सुरुवात केली होती. तसेच सावरकरांनी वेगळ्या नावाने स्वत:वर पुस्तक लिहले आणि आपण किती शूरवीर होतो, हे सांगितले. सावरकरांना इंग्रजांकडून पेन्शन मिळायची, ते इंग्रजांसाठी काँग्रेस पक्षाविरोधात काम करायचे”, असे राहुल गांधी यांनी म्हटले होते.