मुंबई : कुर्ला इमारत दुर्घटना : जखमींना एकनाथ शिंदे आणि शिवसेना आमदारांकडून मदत जाहीर

मुंबई : मुंबईतील कुर्ला नेहरूनगर परिसरात एक इमारत कोसळली. या दुर्घटनेत अनेकजण ढिगाऱ्याखाली दबल्याची माहिती आहे. घटनास्थळी बचावकार्य सुरू असून याबाबत आता एक मोठी अपडेट हाती आली आहे. इमारत दुर्घटनेत जखमी झालेल्या नागरिकांना आता एकनाथ शिंदे यांनी मदत करण्याच्या सूचना दिल्या आहेत. त्यानंतर स्थानिक आमदार मंगेश कुडाळकर यांनी दुर्घटनेतील मृतांना 5 लाख तर जखमी झालेल्या नागरिकांना प्रत्येकी 1 लाखांची मदत जाहीर केली आहे. 

कुर्ला येथील नाईक नगरमध्ये सोमवारी रात्री उशिरा ही ४ मजली इमारत कोसळली असून, या घटनेची माहिती मिळताच अग्निशमन दलाचे जवान आणि पोलिसांचे (Police) पथक घटनास्थळी दाखल झाले. स्थानिक रहिवाशांच्या मदतीने तेथे बचावकार्य सुरू करण्यात आले. अनेकांना यातून बाहेर काढण्यात आले. या दुर्घटनेत काही जण किरकोळ जखमी झाले आहेत, तर एकाचा यात मृत्यू झाला आहे. मृत्यू झालेल्याची ओळख पटवण्याचं काम अद्याप सुरू आहे.

दरम्यान, इमारत दुर्घटनेची माहिती मिळताच, गुवाहाटी येथे थांबलेल्या एकनाथ शिंदे यांच्या सूचनेनुसारत स्थानिक आमदार मंगेश कुडाळकर यांनी आर्थिक मदतीची घोषणा केली आहे. इमारत दुर्घटनेनत जखमी झालेल्यांना 1 लाख रुपयांची तर मृत्यू झालेल्यांच्या कुटुंबीयांना पाच लाख रुपयांची मदत जाहीर करण्यात आली आहे.

दरम्यान, एकनाथ शिंदे यांनी जवळपास 40 आमदारांसह शिवसेनेतून बंड केलं आहे. शिंदे यांच्या बंडाला भाजपचा पाठिंबा असल्याचं बोललं जात आहे. अशातच शिंदे यांच्या बंडामुळे महाविकास आघाडी सरकार अल्पमतात आलं आहे. त्यामुळे सरकार कोसळेल आणि भाजपची सत्ता येईल अशा चर्चा महाराष्ट्राच्या राजकारणात रंगल्या आहेत.