नवी दिल्ली : नवीन वर्षात मोठी दुर्घटना; रुग्णालयाला लागली भीषण आग; दोघांचा होरपळून मृत्यू, अनेक जण बचावले

नवी दिल्ली : दिल्लीतील ग्रेटर कैलास भागात रविवारी पहाटे एका नर्सिंग होममध्ये (GK-2 Nursing Home Fire) लागलेल्या आगीत किमान 2 जणांचा होरपळून मृत्यू झाला. मिळालेल्या माहितीनुसार, ही घटना आज पहाटे 5.15 वाजता घडलीये.

पोलीस आणि अग्निशमन विभागाच्या अधिकाऱ्यांनी घटनास्थळावरून आतापर्यंत 6 जणांची सुटका केलीये. या आगीची माहिती मिळताच अग्निशमन दलाच्या 4 गाड्या घटनास्थळी दाखल झाल्या आणि त्यांनी आगीवर नियंत्रण मिळवण्यास सुरुवात केली. सुमारे 1 तासाच्या प्रयत्नानंतर अग्निशमन दलाच्या जवानांनी आग आटोक्यात आणलीये.

दरम्यान, आगीचं कारण अद्याप समजू शकलेलं नाही. पोलीस पथक घटनास्थळाची पाहणी करत आहे. तत्पूर्वी, 17 डिसेंबरच्या सकाळी दिल्लीतील ग्रेटर कैलास पार्ट-1 येथील फिनिक्स हॉस्पिटलमध्ये आग लागली होती. रुग्णालयाच्या तळघरात आग लागल्याची माहिती मिळताच अग्निशमन दलाच्या 5 गाड्या घटनास्थळी दाखल झाल्या आणि त्यांनी आगीवर नियंत्रण मिळवलं. फिनिक्स रुग्णालयात सकाळी 9.30 वाजता आग लागल्याची माहिती अग्निशमन विभागाला मिळाली होती.