धोनी भाजपामध्ये करणार प्रवेश? अमित शाहांबरोबर हस्तांदोलन करतानाचा फोटो ठरतोय चर्चेचा विषय

भारताचा माजी कर्णधार आणि सध्या चेन्नई सुपर किंग्जचा कर्णधार असलेला महेंद्र सिंग धोनी पुन्हा एकदा चर्चेत आहे. झालं असं की नुकतीच धोनीने केंद्रीय गृहमंत्री अमित शाह यांची भेट घेतली. या भेटीदरम्यानचा एक फोटो व्हायरल झाला आहे. अनेकांनी या फोटोवरुन धोनी राजकीय इनिंग तर सुरु करणार नाही ना यासंदर्भातील प्रश्न उपस्थित केला आहे.

व्हायरल झालेल्या फोटोमध्ये धोनी आणि अमित शाह हस्तांदोलन करताना दिसत आहेत. चेन्नईमधील एका कार्यक्रमादरम्यान या दोघांची भेट झाली. इंडिया सिमेंट्स या कंपनीला ७५ वर्ष पूर्ण झाल्यानिमित्त आयोजित करण्यात आलेल्या कार्यक्रमामध्ये हे दोन्ही मान्यवर उपस्थिती होते. भारतीय क्रिकेट नियमन मंडळाचे माजी अध्यक्ष एन. श्रीनिवासन यांच्या मालकीची ही कंपनी आहे. एन. श्रीनिवासन हेच इंडियन प्रमियर लीगमधील चेन्नईच्या संघाचे मालक आहेत. धोनी आणि श्रीनिवासन यांचे फार घनिष्ट संबंध असल्याने धोनी या कार्यक्रमाला आवर्जून उपस्थित होता.