गुजरात : मोरबी दुर्घटनेप्रकरणी पंतप्रधान मोदी अ‍ॅक्शन मोडमध्ये, गांधीनगरमध्ये बोलवली उच्चस्तरीय बैठक

गुजरातच्या मोरबी येथे १०० वर्षे जुना झुलता पूल कोसळल्याची घटना रविवारी संध्याकाळच्या सुमारास घडली होती. या घटनेत १३४ जणांचा मृत्यू झाला होता. दरम्यान, आज पंतप्रधान नरेंद्र मोदी यांनी गांधीनगरमध्ये उच्चस्तरीय बैठक बोलावली होती.

या बैठकीत पंतप्रधान मोदी यांनी मोरबी दुर्घटनेच्या सद्यस्थितीचा आढावा घेतला. दरम्यान, पंतप्रधान मोदी हे तीन दिवसीय गुजरात दौऱ्यावर असून उद्या (मंगळवारी) ते घटनास्थळी भेट देणार आहेत.

या प्रकरणी ९ जणांना अटक

या प्रकरणी गुन्हा दाखल झाल्यानंतर ओरेव्हा कंपनीच्या मॅनेजरसह तिकीट खिडकीवरील कर्मचारी आणि पुलाचे व्यवस्थापन करण्याऱ्या नऊ जणांना अटक करण्यात आली आहे. तसेच त्यांच्या विरोधात सदोष मनुष्यवधाचा गुन्हा दाखल करण्यात आला असल्याची माहिती राजकोट पोलिसांनी दिली आहे.

रविवारी संध्याकाळी घडलेल्या या भीषण घटनेत १३४ जणांचा मृत्यू झाला होता. तर अनेकजण जखमी होते. या दुर्घटनेत राजकोटचे भाजपा खासदार मोहनभाई कल्याणजी कुंदारिया यांच्याही परिवारातील १२ जणांचा मृत्यू झाला.