मुंबई : संतापजनक! गपणती मंडप उभारण्यावरुन मुंबईत मनसे पदाधिकाऱ्याची महिलेला मारहाण

मुंबईतील मुंबादेवी परिसरात एका मनसे पदाधिकाऱ्याने गणपतीचा मंडप उभारण्यावरून महिलेला मारहाण केल्याचा धक्कादायक प्रकार घडला आहे. याचा व्हिडीओ सोशल मीडियावर व्हायरल होत आहे. या मारहाणीवरून मनसे पदाधिकाऱ्यावर जोरदार टीकाही होत आहे. या मनसे पदाधिकाऱ्याचं नाव विनोद अरगिले असं आहे. आरोपी मनसेचा उपविभाग प्रमुख आहे.

मनसेच्या कार्यकर्त्यांनी एका ठिकाणी गणपती मंडप उभारला होता. तेथेच बॅनर, होर्डिंग लावण्यासाठी मेडिकल शॉपसमोर बांबू लावला जात होता. याला पीडित महिलेने विरोध केला. यानंतर ही मारहाण झाली, असा आरोप तक्रारदार महिलेने केला आहे. या प्रकरणी या महिलेने पोलिसांकडे तक्रार केली आहे. मात्र, अद्याप दोषींवर कोणतीही कारवाई झालेली नाही. गणेशोत्सवानंतर आरोपींना पोलीस स्टेशनला बोलावलं जाईल, असं पोलीस सांगत असल्याचं पीडितेने सांगितलं.

दरम्यान, हा व्हिडीओ दोन दिवसांपूर्वीचा असल्याचं समोर येत आहे. या व्हिडीओत आरोपी या महिलेला थोबाडीत मारताना दिसत आहे. तसेच पीडितेला ढकलून देतानाही दिसत आहे. विशेष म्हणजे हा सर्व प्रकार सुरू असताना घटनास्थळी अनेक लोकही जमा झालेले दिसत आहेत. मात्र, मारहाण होताना कुणीही रोखताना दिसत नाही.