‘प्रसिका’चे सोशल मीडिया अकाऊंट्स सस्पेंड; इन्फ्लुएन्सर जोडीला मोठा धक्का

सोशल मीडियावर ‘प्रसिका’ या नावाने प्रसाद आणि दीपिका वेदपाठक ही नवरा-बायकोची जोडी खूप लोकप्रिय आहे. परंतु या दोघांना नुकताच मोठा झटका मिळाला आहे. प्रसाद आणि दीपिकाचे सोशल मीडिया अकाऊंट अचानक सस्पेंड झाले आहेत. सोशल मीडियावरील त्यांच्या सर्व प्रमुख अकाऊंट्सवर ही कारवाई करण्यात आली आहे. या प्रसिद्ध जोडप्याचे सोशल चॅनल्स अचानक बंद झाल्याने चाहत्यांनाही मोठा धक्का बसला आहे. ‘मेटा’ने नेमकी अशी कारवाई का केली आणि त्यांचे सोशल मीडिया अकाऊंट्स का सस्पेंड करण्यात आले, याविषयी अनेकजण प्रश्न विचारत आहेत. ‘प्रसिका’ या नावाने प्रसिद्ध असलेल्या या जोडीचे खास जेवण बनवतानाचे व्हिडीओ तुफान व्हायरल व्हायचे. इन्स्टाग्रामवर त्यांचा मोठा चाहतावर्ग आहे.

सोशल मीडिया अकाऊंट्सवर झालेल्या कारवाईबाबत प्रसादने माहिती दिली आहे. तो म्हणाला, “गेल्या दहा वर्षांपासून आम्ही प्रामाणिकपणे कंटेंट बनवतोय. आम्ही कधीही कम्युनिटी गाइडलाइन्सचं (नियमांचं) उल्लंघन केलेलं नाही. सर्व नियम पाळूनसुद्धा आमचे सर्व अकाऊंट्स अचानक सस्पेंड करण्यात आले आहेत. यामागचं कारण अद्याप समोर आलेलं नाही.” त्याचप्रमाणे त्याने या प्रकरणाची तातडीने दखल घेण्याचीही विनंती संबंधित प्लॅटफॉर्म्सना केली आहे.

याविषयी प्रसादने पुढे सांगितलं, “आमच्या सर्व अकाऊंट्स व्हेरिफाइट होत्या. सध्या आमचे ब्रँड्स आणि क्लायंट्स प्रतीक्षा करत आहेत. आमचे ब्रँड्ससोबतचे बरेच प्रोजेक्ट्स रखडले आहेत. अकाऊंटचा एक्सेस नसल्याने ते काम पूर्ण करता येत नाहीये.” “नमस्कार मंडळी, सर्वांनी जेवायला या..” असं म्हणत प्रसाद त्याच्या व्हिडीओची सुरुवात करायचा आणि त्यानंतर दीपिका तिच्या खास अंदाजात एकापेक्षा एक दमदार असे पदार्थ बनवून दाखवायची. ‘आपलं मीठ’ हा तिचा खास डायलॉग प्रसिद्ध होता.

संबंधित सोशल मीडिया प्लॅटफॉर्म्सकडून अद्याप कोणतीही प्रतिक्रिया समोर आली नाही. परंतु प्रसाद आणि दीपिकाने त्यांचे सर्व अकाऊंट्स पुन्हा सुरू व्हावेत यासाठी प्रयत्न करत आहेत. नेटकऱ्यांनीही त्यांच्या बाजूने अनेक प्रतिक्रिया दिल्या आहेत. इन्स्टाग्राम अकाऊंट आणि युट्यूब चॅनल्सद्वारे असंख्य इन्फ्लुएन्सर्स दर महिन्याला लाखोंची कमाई करतात. सोशल मीडिया हीच त्यांची मोठी ओळख असते. अशातच अचानक अशा पद्धतीने कारवाई झाल्यामुळे त्यांना मोठा फटका बसतो. त्यातही अकाऊंट रिकव्हर झाल्यानंतर काही फॉलोअर्स गमवावे लागले तरी त्यांना नुकसान सहन करावं लागतं.