पुण्यात नायलॉन मांजामुळे दोन पोलिस कर्मचारी जखमी; एकाचा गळा, तर दुसऱ्याचा हात चिरला

पुणे : नायलॉन मांजावर घातलेले बंदीचे आदेश धुडकावून संक्रातीला पतंगबाजी करण्यात आल्याचे उघडकीस आले आहे. पुणे-सातारा रस्त्यावरील शंकर महाराज उड्डाणपुलावर नायलॉन मांजामुळे दुचाकीस्वार दोन पोलीस जखमी झाल्याची घटना घडली.

पोलीस कर्मचारी महेश पवार आणि सुनील गवळी अशी जखमी झालेल्यांची नावे आहे. पवार आणि गवळी दोघे शिवाजीनगर पोलीस मुख्यालयात नियुक्तीस आहेत. रविवारी दुचाकीस्वार पवार आणि गवळी पुणे-सातारा रस्त्यावरील शंकर महाराज उड्डाणपुलावरुन निघाले होते. त्या वेळी मांजा मानेला अडकल्याने पवार यांच्या गळ्याला दुखापत झाली. त्यांच्याबरोबर असलेले सहकारी गवळी यांचा हात मांजामुळे चिरला, अशी माहिती हेल्प रायडर्स संस्थेचे स्वयंसेवक, पक्षीमित्र  बाळासाहेब ढमाले यांनी दिली.