पुणे: बालकाशी अश्लील कृत्य करणारा केशकर्तनालयातील कारागीर गजाआड

पुणे : केस कापण्यासाठी आलेल्या सात वर्षांच्या बालकाशी अश्लील कृत्य करणाऱ्या केशकर्तनालयातील कारागिरास विमानतळ पोलिसांनी अटक केली. सज्जन सहेआलम सलमानी (वय २०, रा. संतनगर, लोहगाव) असे अटक करण्यात आलेल्याचे नाव आहे. याबाबत पीडित बालकाच्या वडिलांनी विमानतळ पोलीस ठाण्यात फिर्याद दिली आहे. आरोपी सलमानी लोहगावमधील संतनगर परिसरातील केशकर्तनालयात कारागीर आहे. पीडित बालकाला घेऊन त्याची आई केशकर्तनालयात आली होती.

सलमानीला बालकाचे केस कापण्यास सांगून आई घरी गेली. काही वेळानंतर बालकाला घेण्यासाठी त्याची आई केशकर्तनालयात आली. त्याला घरी नेण्यात आले. तेव्हा सलमानीने अश्लील कृत्य केल्याचे त्याने आईला सांगितले. सलमानी याच्या विरोधात बाल लैंगिक अत्याचार कायद्यान्वये गुन्हा दाखल करण्यात आल्याची माहिती विमानतळ पोलीस ठाण्याचे वरिष्ठ पोलीस निरीक्षक विलास सोंडे यांनी सांगितले.