मुंबई : संयम संपला, एसटी कर्मचाऱ्यांना शेवटचा इशारा देत अजित पवार यांची मोठी घोषणा…

मुंबई : एसटी कर्मचाऱ्यांनी उद्यापासून कामावर रुजू व्हावं अन्यथा त्यांच्यावर बडतर्फीची कारवाई करुन त्यांच्याजागी नवीन कामगार भरती करण्यात येतील, अशी घोषणा उपमुख्यमंत्री अजित पवार यांनी केली आहे. आज राज्य मंत्रिमंडळाची महत्त्वाची बैठक पार पडतीय. या बैठकीत एसटी कर्मचाऱ्यांच्या नव्या भरतीसंदर्भात चर्चा होण्याची शक्यता आहे. अजित पवार यांचा शेवटचा इशारा अजित पवार म्हणाले, "३१ तारखेपर्यंत सगळ्या कामगारांना कामावर परतण्याची संधी द्यावी, अशी सगळ्यांची भूमिका होती. त्यानुसार सरकारने विचाराअंती कामगारांना परत कामावर परतण्याची संधी दिली. वेळोवेळी कामावर परतण्यासंबंधी आवाहन केलं. तत्पूर्वी काही कामगार देखील कामावर परतले. पण अजूनही काही कामगार संपावर ठाम आहेत. त्यांना मी सांगू इच्छितो, की आपण सारासार विचार करुन उद्या कामावर रुजू व्हा, अन्यथा तुमच्यावर बडतर्फीची कारवाई करुन तुमच्याजागी नवी कामगार भरती करण्यात येईल" राज्य सरकार संपकरी कर्मचाऱ्यांच्या बाबत कठोर निर्णय घेण्याच्या तयारीत असल्याचं अजित पवार म्हणाले. कठोर निर्णय म्हणजे संबंधित कर्मचाऱ्यांना कामावरुन काढून टाकून त्यांच्याजागी नवीन भरती करणार, अशी घोषणाच अजित पवार यांनी केली. तसंच त्यासंबंधी आजच्या कॅबिनेटमध्ये चर्चा होणार असल्याचं देखील अजित पवार यांनी सांगितलं. दुसरीकडे सरकारने दिलेल्या अल्टीमेटमनंतरही जळगाव जिल्ह्यातील एसटी कामगार संपावर ठाम आहे. 'सरकारने आम्हाला गोळ्या घालाव्या, पण आम्ही आमच्या मागण्या पूर्ण झाल्याशिवाय मागे हटणार नाही, असा निर्धार व्यक्त केला आहे. "गेल्या ५ महिन्यांपासून आम्ही आमच्या मागण्यांसाठी संपावर आहोत. पण आमच्या भावना समजून घेण्यात सरकार कमी पडलं. सरकारला आमचं सांगणं आहे, आता लढाई अंतिम टप्प्यात असल्याने आम्ही मागे हटणार नाही. प्रसंगी गोळ्या झेलण्याची आमची तयारी आहे", असा पवित्रा एसटी कर्मचाऱ्यांनी घेतला आहे.