पुणे : व्हॉट्सॲप स्टेट्स ठेवून विवाहितेची आत्महत्या

यवत - आत्महत्या करत असल्याचा व्हॉट्सॲप स्टेट्स ठेवून बेपत्ता झालेल्या कोयल नवनाथ बारवकर (रा. खामगाव-कांचनवाडी, ता. दौंड, मूळ रा. तांदूळवाडी, ता. बारामती) या विवाहितेचा मृतदेह यवत (ता. दौंड) येथील ‘हॉटेल अन्नपूर्णा’च्या मागील बाजूस नवा मुठा उजवा कालव्यात आढळून आल्याची माहिती यवत पोलिसांनी दिली.

कोयल बारवकर यांचे पाच वर्षांपूर्वी लग्न झाले होते. मात्र, पतीशी घरगुती वाद झाल्याने त्या आपले बंधू कुणाल कोल्हे यांच्याकडे खामगाव येथे राहत होत्या. त्यांनी गुरुवारी (ता. २३) यवत येथील ‘हॉटेल कांचन’जवळील कालव्याच्या पुलावर छायाचित्र काढून ते व्हॉट्सॲप स्टेटसवर ठेवले व त्याखाली इंग्रजीत ‘i am sucide’ असे लिहिले. ते कुणाल यांनी पाहिले. त्यानंतर त्यांनी कोमल यांच्या मोबाईलवर अनेक वेळा फोन केले. मात्र, फोन उचलला जात नव्हता. त्यानंतर ‘स्टेटस’मधील छायाचित्रातील पार्श्वभूमीवरून संबंधित ठिकाणी ते पोहोचले. मात्र, तेथे मोबाईल ओढणीत गुंडाळून पुलाच्या कठड्याला बांधलेला आढळून आला. त्यामुळे त्यांनी कालव्याच्या पाण्यात शोधण्याचा प्रयत्न केला. मात्र, त्यात यश आले नाही.