पुणे : मनसेच्या नाराज कार्यकर्त्यांनी राष्ट्रवादीत यावं – प्रशांत जगताप

मनसे अध्यक्ष राज ठाकरेंनी मुंबईत मांडलेले विचार मराठी मातीत तयार झालेल्या कार्यकर्त्याला न पटणारे आहेत. त्यामुळे मागील पाच -सहा दिवसांपासून मनसेच्या कार्यकर्त्यांमध्ये नाराजी आहे.

खासकरुन पुण्यातल्या मनसे कार्यकर्त्यांमध्ये नाराजी आहे.पुण्यातल्या मनसेच्या नाराज कार्यकर्त्यांनी राष्ट्रवादी कॉंग्रेसमध्ये यावं, असं आवाहन राष्ट्रवादी कॉंग्रेसचे शहराध्यक्ष प्रशांत जगताप यांनी केल. वसंत मोरे यांचं राष्ट्रवादीत स्वागत आहे. त्यांचा सन्मान जपला जाईल,असं म्हणत त्यांनी वसंत मोरे यांना देखील राष्ट्रवादीत येण्याचं खास निमंत्रण दिलं.

जातिधर्माचे जोडे बाजूला ठेऊन ज्यांना देशाचा विकास करायचा आहे त्यांनी राष्ट्रवादी कॉंग्रेसमध्ये यावं असं आवाहन प्रशांत जगताप यांनी केलंय. मनसेचे पुणे शहराध्यक्ष वसंत मोरे यांनी राज ठाकरेंच्या मशिदीच्या भोंग्यासमोर हनुमान चालिसा वाचनाविषयी केलेल्या विधानावर वसंत मोरेंनी आपली वेगळी भूमिका मांडली होती. त्यानंतर वसंत मोरे यांची मनसेच्या शहराध्यक्षपदावरुन हकालपट्टी करण्यात आली. तसेच पुण्यातील नाराज मनसेच्या पदाधिकाऱ्यांनी राजीनामे देखील दिले होते.