इंदौर : मोबाईल चार्जरच्या केबलनं पतीनं पत्नीचा गळा आवळून केला खून

इंदौरमध्ये मंगळवारी रंगपंचमी साजरी होत असतानाच दुसरीकडं इंदौरच्या द्वारकापुरी भागात एक हृदयद्रावक घटना समोर आलीय. इथं एका कंत्राटदारानं आधी आपल्या पत्नीचा मोबाईल चार्जरच्या केबलनं गळा आवळून खून केला आणि नंतर स्वत: गळफास घेऊन आत्महत्या केलीय.

पोलिसांनी  दिलेल्या माहितीनुसार, रंगपंचमीच्या दिवशी मुलं घराबाहेर पडताच कंत्राटदारानं हे पाऊल उचललंय. पतीला पत्नीच्या चारित्र्यावर संशय होता, यावरून दोघांमध्ये बराच काळ वाद सुरू होता. दरम्यान, पोलिसांना घटनास्थळावर एक सुसाईड नोटही सापडलीय. यात ‘मी माझ्या पत्नीची हत्या करून आत्महत्या करत आहे’, असं लिहिलंय.

रणजित हा बांधकाम कंत्राटदार होता. रणजीतनं स्वतःची पत्नी संतोषीबाईचा चार्जर केबलनं गळा आवळून खून केला आणि नंतर स्वत: गळफास लावून घेतलाय. या घटनेदरम्यान सौरभ (वय 14) आणि मुलगी निधी (वय 10) ही मुलं रंगपंचमीच्या दिवशी घराबाहेर होळी खेळत होती. दरम्यान, मुलांनी घरात येऊन पाहिल्यानंतर त्यांनी आजूबाजूच्या लोकांना ही माहिती दिली. घटनास्थळावरून पोलिसांनी एक सुसाईड नोटही जप्त केलीय. सध्या पोलिसांनी गुन्हा दाखल करून तपास सुरू केलाय.