Kasba-Chinchwad Bypoll Election: तेव्हा फडणवीसांनी माझं ऐकलं, आता तुम्ही ऐका; राज ठाकरेंच मविआला आवाहन

Raj Thackeray : मनसे अध्यक्ष राज ठाकरे यांनी कसबा आणि चिंचवड पोटनिवडणूक बिनविरोध करा, असे आवाहन सर्वपक्षीय नेत्यांना केले आहे. अंधेरी पोटनिवडणुकीत भाजपने जो उमदेपणा दाखवला तोच महाविकास आघाडीनेही कसबा आणि चिंचवडमध्ये दाखवावा, असे राज ठाकरे यांनी म्हटले आहे. 

कसबा आणि चिंचवड पोटनिवडणुकीसाठी सर्व पक्षांनी कंबर कसली आहे. आज महाविकास आघाडीचे उमेदवार घोषीत होऊ शकतात. मात्र राज ठाकरे यांच्या पत्रामुळे आता संभ्रम वाढला आहे. महाविकास आघाडी आता काय निर्णय घेणार याकडे सर्वांचे लक्ष लागले आहे. 

राज ठाकरे म्हणाले, "महाराष्ट्र विधानसभेच्या २ आमदारांच नुकतंच दुःखद निधन झालं. ह्या निधनामुळे रिक्त झालेल्या विधानसभा मतदारसंघांमध्ये पोटनिवडणूका होत आहेत. मी अगदी सुरुवातीपासून ह्या मताचा आहे की, जेव्हा एखाद्या विद्यमान लोकप्रतिनिधीचं निधन होतं तेंव्हा तिथे होणारी पोटनिवडणूक शक्यतो बिनविरोध करावी. कारण मुळात जसा त्या विधानसभेतील कौल लोकप्रतिनिधीला असतो, तसाच कौल त्याच्या पक्षाला देखील असतो."

"अनेकदा त्या पोटनिवडणुकीत उमेदवार हा मृत व्यक्तीच्या घरातील असतो, अशावेळेस पक्षाने जर मृत व्यक्तीच्या घरातील उमेदवार दिला असेल तर, त्या उमेदवाराला बिनविरोध निवडून देणं ही एका उमद्या राजकीय संस्कृतीने त्या निधन झालेल्या व्यक्तीला दिलेली श्रद्धांजलीच ठरणार नाही का? आणि ही प्रगल्भता महाराष्ट्राच्या राजकारणाला नवीन नाही. अर्थात उमेदवार जर निधन पावलेल्या लोकप्रतिनिधीच्या घरातील नसेल तर, जनता देखील सहानभूती दाखवेलच असं नाही."

"अंधेरी पूर्व विधानसभेच्या पोटनिवडणुकीच्या वेळेस, दिवंगत आमदार रमेश लटके ह्यांच्या पत्नी शिवसेनेच्या तिकिटावर उभ्या होत्या, त्यावेळेस मी देवेंद्र फडणवीस ह्यांना निवडणूक बिनविरोध करण्याचं आव्हान केलं होतं. ज्याला सकारात्मक प्रतिसाद देत, त्यांनी ती निवडणूक बिनविरोध होऊ दिली," असे देखील राज ठाकरे यांनी म्हटले आहे. 

आता पुन्हा पिंपरी-चिंचवड आणि कसबा विधानसभांमध्ये पोटनिवडणूका होत आहेत. जो उमदेपणा भारतीय जनता पक्षाने दाखवला तोच उमदेपणा महाविकास आघाडीच्या नेत्यांनी देखील दाखवावा. महाराष्ट्राची राजकीय संस्कृती प्रगल्भ आहे हे देशाला दाखवून देण्याची संधी आपल्याला सर्वाना आहे. हीच नाही तर एकूणच अशा दुखद घटनांमुळे होणाऱ्या पोटनिवडणुका बिनविरोध कराव्यात ही इच्छा, असे राज ठाकरे यांनी पत्रात म्हटले आहे.