Mumbai-Pune Expressway: मुंबई-पुणे एक्स्प्रेस वेवर ९ वाहनं एकमेकांना धडकली; अंगाचा थरकाप उडवणारा अपघात

रायगड : मुंबई-पुणे एक्स्प्रेस वेवरील अपघातांची मालिका काही संपण्याचं नाव घेत नाहीये. मागील अनेक दिवसांपासून या एक्सप्रेस वेवरती मोठ्या प्रमाणात वाहतूक कोंडी आणि अपघात होत आहेत. अशातच पुन्हा आणखी एक भयंकर अपघात एक्स्प्रेस वेवर झाला आहे.

खोपोलीजवळील बोरघाटात आज झालेल्या अपघातामध्ये तब्बल ९ वाहने एकमेकांना धडकली असून या अपघातामध्ये वाहनांचे मोठ्या प्रमाणावर नुकसान झाल्याची माहिती समोर आली आहे. अपघात झालेल्या वाहनामंध्ये एक ट्रक, एसटी बस (ST) आणि ७ कारचा समावेश असून या भयानक अपघातात सुदैवाने कोणीही जखमी झालेलं नाही.

मिळालेल्या माहितीनुसार, खोपोलीजवळील बोरघाटात मुंबई लेनवरती ब्रेक फेल झाल्यामुळे ट्रक चालकाचे नियंत्रण सुटले आणि या ट्रकने एसटी बससह इतर ७ कारना धडक दिली असल्याची प्राथमिक माहिती समोर आली आहे. या अपघातामुळे मुंबई-पुणे एक्स्प्रेस वेवरील वाहतूक काही काळ विस्कळीत झाली होती. वाहतूक पोलिसांनी ही वाहतूक कोंडी सुरळीत केली आहे.