USA vs NED : यूएसएचा ऐतिहासिक विजय, नेदरलँड्सचा 93 धावांनी धुव्वा, मुंबईकर हरमीत सिंह चमकला

यूएसए अर्थात यूनायटेड स्टेट्‍स ऑफ अमेरिका संघाने आयसीसी टी 20i वर्ल्ड कप 2026 स्पर्धेत ऐतिहासिक असा विजय मिळवला आहे. यूएसएने स्पर्धेतील 21 व्या सामन्यात नेदरलँड्सवर 93 धावांच्या मोठ्या फरकाने विजय साकारलाय. यूएसएने नेदरलँड्ससमोर 197 धावांच आव्हान ठेवलं होतं. मात्र यूएसएच्या गोलंदाजांसमोर नेदरलँड्सला पूर्ण 20 ओव्हरही लढत देता आली नाही. यूएसएने नेदरलँड्सला 15.5 ओव्हरमध्ये 103 रन्सवर गुंडाळलं. यूएसएने यासह नेदरलँड्सला सलग दुसरा विजय मिळवण्यापासून यशस्वीरित्या रोखलं. तसेच यूएसए वर्ल्ड कप स्पर्धेतील 10 व्या पर्वात सलग 2 पराभवानंतर विजयाचं खातं उघडण्यात यशस्वी ठरली. तसेच यूएसएचा हा टी 20i क्रिकेटमधील नेदरलँड्स विरुद्धचा 4 सामन्यांनंतरचा पहिला विजय ठरला. सोबतच यूएसने या विजयासह स्पर्धेतील आव्हान कायम ठेवलं आहे.

यूएसएची कडक बॅटिंग

न्यूझीलंडने टॉस जिंकून यूएसएला बॅटिंगसाठी भाग पाडलं. यूएसएने या संधीचा दोन्ही हातांनी फायदा घेतला. कॅप्टन मोनांक पटेल आणि शायान जहांगीर या दोघांनी यूएसएला आश्वासक सुरुवात करुन दिली. त्यानंतर साईतेजा मुक्कामल्ला याने धमाका केला. तर मुंबईकर शुभम रांजने याने फिनिशिंग टच दिला. त्यामुळे यूएसएला 190 पार मजल मारता आली.

मोनांक पटेल याने 22 बॉलमध्ये 36 रन्स केल्या. शायानने 20 धावांचं योगदान दिलं. साईतेजा याने नेदरलँड्सच्या गोलंदाजांना झोडून काढला. साईतेजाने यूएसएसाठी सर्वाधिक धावांचं योगदान दिलं. साईने 51 बॉलमध्ये 4 सिक्स आणि 5 फोरसह 79 रन्स केल्या. तर शुभम रांजने अखेरीस नाबाद परतला. शुभमने 200 च्या स्ट्राईक रेटने 48 रन्स केल्या. शुभमने 2 सिक्स आणि 3 फोर लगावले. तर नेदरलँड्ससाठी बास डी लिडे याने सर्वाधिक 3 विकेट्स मिळवल्या.

नेदरलँड्सचं 103 रन्सवर पॅकअप

यूएसएच्या गोलंदाजांसमोर 197 धावांचा पाठलाग करायला आलेल्या नेदरलँड्सच्या 4 फलंदाजांनाच दुहेरी आकड्यापर्यंत पोहचता आलं. नेदरलँड्साठी बास डी लिडे याने सर्वाधिक 23 धावा केल्या. स्कॉट एडवर्ड्स याने 20 धावांचं योगदान दिलं. या दोघांव्यरिक्त एकालाही 20 या आकड्यापर्यंत पोहचता आलं नाही.

यूएसएचा दणदणीत विजय

Massive victory for Team USA against the Netherlands 👏👏

Credit: ICC/Getty#TeamUSA #T20WorldCup @T20WorldCup @ICC pic.twitter.com/ZAnbpscilH

— USA Cricket (@usacricket) February 13, 2026

नेदरलँड्सला गुंडाळण्यात मुंबईकर फिरकीपटू हरमीत सिंग याने प्रमुख योगदान दिलं. हरमीतने सर्वाधिक 4 विकेट्स मिळवल्या. शॅडली व्हॅन शाल्कविक याने तिघांना मैदानाबाहेरचा रस्ता दाखवला. मोहम्मद मोहसिन याने 2 विकेट्स मिळवल्या. तर नोस्थुश केंजीगे याने 1 विकेट मिळवत इतरांना चांगली साथ दिली. यूएसएने अशाप्रकारे विजय मिळवला.