Thane Ring Metro : रिंग मेट्रोमुळे ठाणेकरांचा प्रवास अधिक सुलभ; २९ किमी मार्गावर २२ स्थानकं, कुठे आणि कसा असेल संपूर्ण रूट?

Thane : ठाणे शहराच्या अंतर्गत धावणारी ठाणे रिंग मेट्रो ठाणेकरांचा प्रवास अधिक सुलभ होणार आहे. महामेट्रोने या प्रकल्पासाठी निविदा जाहीर केली आहे. या मेट्रो मार्गावरील ८ स्थानकांच्या बांधकामाबाबत निविदा काढली आहे. हा मार्ग एकूण २९ किमी लांबीचा असून या मार्गावर एकूण २२ स्थानकं असणार आहेत.
स्टेशन कुठे असतील

या २९ किमी लांब वर्तुळाकार मार्गासाठी एकूण १२,२००.१० कोटींचा खर्च येईल असं सांगितलं जात आहे. दरम्यान २९ किमी अंतराच्या या मार्गावर ८ स्टेशन ठाण्यामधील मानपाडा, डोंगरीपाडा, विजय नगरी, वाघबीळ, वॉटरफ्रंट, पाटीलपाडा, ठाणे जंक्शन आणि नवीन ठाणे असे असणार. तर यातील ठाणे जंक्शन आणि ठाणे आणि न्यू ठाणे ही स्थानकं भूमिगत असणार आहेत. तसेच उर्वरित सहा स्टेशन उन्नत असतील. ठाण्यात वाघबीळ, विजय नगरी, डोंगरीपाडा, मानपाडा, गांधीनगर, वागळे इस्टेट कोळशेत, हिरानंदानी इस्टेट अशा गर्दीच्या ठिकाणांवरून ही मेट्रो जाणार आहे.

या इन्ट्रा सिटी मार्गिकेमुळे मेट्रो स्थानक, रेल्वे आणि बस स्थानकांशी थेट जोडली जाणार आहेत. मुंबई मेट्रो लाईन ४ आणि मुंबई मेट्रो ४अ जी गायमुख-वडाळा मार्गावर धावणार आहे, त्या मार्गिकेला जोडणार आहे. यासह ठाण्यापासून पुढे भिवंडीला जाणाऱ्या मेट्रो लाईन ५ लाही मार्गिका जोडली जाणार आहे.

या मेट्रोचं काम पावसाळ्यानंतर सुरू होईल अशी अपेक्षा आहे. काम सुरू होताच भुयारी स्थानकांचं काम पूर्ण करायला ५ वर्ष तर उन्नत स्थानकांचं काम पूर्ण करण्यासाठी अडीच वर्षांचा कालावधी लागणार आहे. या भुयारी स्थानकांसाठी २२३.७० कोटींचा खर्च होणार आहे, उर्वरित स्थानकांसाठी २२८.४४ कोटी लागणार आहेत.