कर्नाटकहून अयोध्येला जाणाऱ्या मिनी बसचा भीषण अपघात; ट्रकच्या धडकेत 7 ठार

नानपारा लखीमपुर  महामार्गावर नैनिहाजवळ रविवारी पहाटे एका वेगवान ट्रक आणि ट्रॅव्हल्सची (Truck-Travels Accident) समोरासमोर धडक झाली. या अपघातात ट्रॅव्हल्समधील तीन प्रवाशांचा जागीच मृत्यू झाला, तर चार जणांचा रुग्णालयात मृत्यू झाला. मृतांमध्ये चार पुरुष आणि तीन महिलांचा समावेश आहे. नऊ प्रवासी जखमी झाले असून, त्यांच्यावर उपचार सुरू आहेत.

हे प्रवासी कर्नाटकातून लखीमपूरमार्गे अयोध्येला जात होते, असं सांगण्यात येतंय. मात्र, पोलिसांनी अद्याप याला अधिकृत दुजोरा दिलेला नाहीय. पोलीस मृतांची ओळख पटवण्याचा प्रयत्न करत आहेत. दरम्यान, एसएसपी केशव कुमार चौधरी यांनी अपघातात सात जणांचा मृत्यू झाल्याची पुष्टी केलीय. पोलीस अधिकाऱ्यांनी रुग्णालयात पोहोचून जखमींची काळजी घेत त्यांच्यावर योग्य उपचार करण्याच्या सूचना दिल्या आहेत.