Supriya Sule : भाऊबीजेला अजित पवारांची वाट बघणार का? सुप्रिया सुळेंचं उत्तर, “प्रेम असतं तेव्हा…”

Supriya Sule : महाराष्ट्र विधानसभा निवडणुकीचं घोडामैदान जवळ आलं आहे. २० नोव्हेंबरला महाराष्ट्रात सार्वत्रिक निवडणूक पार पडणार आहे. तर २३ नोव्हेंबरला निवडणुकीचा निकाल लागणार आहे. महायुती की महाविकास आघाडी? कोण जिंकणार हे पाहणं महत्त्वाचं असणार आहे. दरम्यान बारामती विधानसभा निवडणुकीची चर्चा रंगली आहे.

बारामतीत पवार विरुद्ध पवार

युगेंद्र पवार हे अजित पवारांचे बंधू श्रीनिवास पवार यांचे पुत्र आहेत. गुरुवारी महाविकास आघाडीतल्या घटक पक्ष असलेल्या राष्ट्रवादी काँग्रेस शरद पवार पक्षाने त्यांचं नाव विधानसभा निवडणुकीसाठी जाहीर केलं. यामुळे बारामतीत पुन्हा एकदा काका विरुद्ध पुतण्या अशी लढत दिसणार आहे. आज सुप्रिया सुळे यांच्यासह जात युगेंद्र पवार यांनी अर्ज दाखल केला. यावेळी सुप्रिया सुळेंनी ( Supriya Sule ) महत्त्वाचं वक्तव्य केलं आहे.

युगेंद्र पवार यांचा बारामतीतून अर्ज दाखल

बारामतीतून सुप्रिया सुळे जिंकल्यानंतर शरद पवारांना मोठा दिलासा मिळाला. या निवडणुकीत सुप्रिया सुळेंच्या प्रचारासाठी युगेंद्र पवार उतरले होते. “आम्ही लोकसभेला चांगली कामगिरी केली. तशीच चांगली कामगिरी आम्ही विधानसभा निवडणुकीतही करणार आहोत. कारण आम्हाला छत्रपती शिवाजी महाराज, शाहू, फुले, आंबेडकर यांचा विचार पुढे न्यायचा आहे. शरद पवार जे उमेदवार जाहीर करतील त्यांना मी पाठिंबा देईन” असंही युगेंद्र पवार म्हणाले होते. याच युगेंद्र पवारांनी उमेदवारी अर्ज दाखल केला. त्याआधी सुप्रिया सुळे यांच्यासह त्यांनी आमराई या घराला भेट दिली. कारण शरद पवारांनी इथूनच त्यांचं राजकारण सुरु केलं आहे. यावेळी सुप्रिया सुळे ( Supriya Sule ) यांनी बारामतीकर आणि आमचं नातं हे मतांचं नाही तर मनाचं आहे अशी प्रतिक्रिया दिली.

काय म्हणाल्या सुप्रिया सुळे?

“मी सगळ्यांच्या चांगल्या आठवणीच लक्षात ठेवते. बारामतीची मायबाप जनता शरद पवारांवर सहा दशकांपासून प्रेम करते आहे. आमचं नातं प्रेमाचं आणि विश्वासाचं आहे. एक काळ असाही होता की पवार कुटुंबाला कुणी ओळखत नव्हतं पण बारामतीकरांनी जी आपुलकी आणि प्रेम दाखवलं त्यामुळे पवार कुटुंब ओळखलं जातं. अजित पवार वेगळे झाले त्याची वेदना आहेच. कारण मी नात्यांना खूप महत्त्व देते. नाती फक्त रक्ताची नाही तर प्रेम आणि विश्वासाची असतात. सत्ता आणि पैसा येतात आणि जातात पण नाती महत्त्वाची असतात तीच टिकतात. ” असं सुप्रिया सुळे ( Supriya Sule ) म्हणाल्या.

अजित पवारांची भाऊबीजेला वाट पाहणार का?

अजित पवारांची भाऊबीजेला वाट पाहणार का? असं विचारलं असता सुप्रिया सुळे ( Supriya Sule ) म्हणाल्या, “कसं असतं एकतर प्रेम कुठूनही केलं तरीही ते प्रेमच असतं. ते एकतर्फीही असू शकतं. आपण प्रेम जेव्हा करतो तेव्हा अपेक्षा कशाला ठेवायची? ” असं उत्तर सुप्रिया सुळेंनी दिलं आहे. बारामतीत युगेंद्र पवार यांचा अर्ज दाखल करण्याआधी सुप्रिया सुळेंनी एबीपी माझाशी संवाद साधला. त्यावेळी त्यांनी अजित पवारांबाबत हे विधान केलं आहे.