पुणे : मुलाने केला जन्मदात्या बापाचा खून; पुणे जिल्ह्यातील खळबळजनक घटना

पुणे : पुणे जिल्ह्यातील दौंड तालुक्यातील वरवंड गावातून धक्कादायक बातमी समोर आली आहे. वरवंड गावातील राजेंद्र म्हस्के या बेपत्ता असलेल्या व्यक्तीचा खून झाल्याचे पोलीस तपासात उघड झाले आहे. मृत व्यक्तीच्या मुलानेच मित्राच्या मदतीने हत्या केल्याची धक्कादायक घटना समोर आली आहे.या घटनेने खळबळ उडाली आहे. या प्रकरणी पोलिसांनी दोघांना अटक केली आहे. 

मिळालेल्या माहितीनुसार, वरवंड गावातील राजेंद्र म्हस्के हे काही दिवसांपासून बेपत्ता होते. घरातून एका ठिकाणी जातो असं सांगून घराबाहेर पडले. मात्र, त्यानंतर घरी परतले नाही. त्यामुळे त्यांच्या कुटुंहबातील व्यक्तींनी पाटस पोलीस चौकीत हरविल्याची तक्रार नोंद केली. वरीष्ठांच्या मार्गदर्शनाखाली सहायक पोलिस निरीक्षक केशव वाबळे यांनी मोठया शिताफिने या तपासाची चक्र फिरवली.तपासादरम्यान त्यांना बेपत्ता राजेंद्र यांची पत्नी व मुलगा यांच्या मध्ये विसंगत माहिती मिळत होती.त्यामुळे पोलिसांची मुलगा वृषभ याच्यावर संशयाची सुई निर्माण झाली.पोलिसांनी त्यांच्या शैलीत चौकशी करताच या प्रकरणाचा भांडाफोड झाला.